தமிழ்நாட்டில் அதிக அளவு முதலீடு செய்யுங்கள்

முதலீட்டாளர்களுக்கு துணை முதல்வர் உதயநிதி ஸ்டாலின் வேண்டுகோள்

- 

தமிழ்நாட்டில் அதிக அளவு முதலீடுகளைச் செய்ய முன்வர வேண்டும் என துணை முதல்வர் உதயநிதி ஸ்டாலின் கேட்டுக் கொண்டார்.

சென்னையில் புதன்கிழமை நடைபெற்ற அறிவுசார் சொத்துரிமைக்கான முதல் மாநாட்டில் அவர் பேசியதாவது:

நாட்டில் உதயமாகும் புதிய தொழில்நுட்பங்களைப் பயன்பாட்டில் கொண்டுவரவும், அதை ஊக்குவிக்கவும் திராவிட இயக்கம் எப்போதும் தயங்கியதில்லை. புதிய தொழில்நுட்பங்கள் சாதாரண மக்களுக்கும் கிடைக்கும் வேண்டும் என்பதில் திமுக உறுதியாக இருக்கிறது. ஆட்சியில் இருக்கும் போதெல்லாம் இதற்கான பணிகளைத் தொடர்ந்து செய்துகொண்டே இருக்கிறது.

எண்ம தொழில்நுட்பத்துக்கான சகாப்தத்தின் பயணத்துக்கு முன்னாள் முதல்வர் கருணாநிதியின் ஆட்சிக் காலத்தில் அடித்தளமிடப்பட்டது. மாநிலத்துக்கென பிரத்யேக தகவல் தொழில்நுட்பக் கொள்கை அவரது ஆட்சியில் தான் அறிமுகப்படுத்தப்பட்டது. கணினி அறிவியல் கல்வி, பள்ளிகளில் பாடத் திட்டமாக கொண்டு வரப்பட்டதுடன், கணினி தொழில்நுட்பம் சார்ந்த அலுவலகங்கள் இயங்குவதற்கு வசதியாக டைடல் பூங்காக்களை உருவாக்கினார். தற்போது அந்தப் பூங்காக்கள் மூலம் லட்சக்கணக்கான இளைஞர்களின் வாழ்வு வசந்தமாகிக் கொண்டிருக்கிறது.