விழிப்புணர்வுதான் தீர்வு!

பெற்றோருக்கு அடுத்தபடியாக மதிக்கப்படக்கூடியவர்கள் ஆசிரியர்கள். தங்களிடம் படிக்கும் மாணவ, மாணவிகளுக்கு வழிகாட்டியாக, வழிநடத்திச் செல்ல வேண்டிய ஆசிரியர்களில் சிலர் வழிதவறும் போக்கு அண்மைக்காலமாக அதிகரித்து வருகிறது.

- 

தமிழகத்தின் பல்வேறு மாவட்டங்களில் பள்ளி மாணவிகள் பாலியல் துன்புறுத்தல்களுக்கு உள்ளாகும் சம்பவங்கள் தொடர்ச்சியாக நடைபெற்று வருகின்றன.

இதுபோன்ற சம்பவங்கள் தொடர்பாக நடவடிக்கை எடுப்பதற்காக 2012-ஆம் ஆண்டிலேயே அரசாணை வெளியிடப்பட்டதாகவும், புகார்களில் சிக்கும் ஆசிரியர்கள் மீது ஒழுங்கு நடவடிக்கை எடுத்து கட்டாய ஓய்வு, பணிநீக்கம் போன்ற கடும் தண்டனைகள் வழங்க அதில் வகை செய்யப்பட்டிருந்ததாகவும் தெரியவருகிறது. முழுமையாக செயல்பாட்டுக்கு வராத அந்த அரசாணையை தற்போது மீண்டும் செயல்படுத்த நடவடிக்கைகள் எடுக்கப்பட்டு வருவதாகவும் அரசுத் தரப்பில் தெரிவிக்கப்பட்டுள்ளது.

தமிழகம் முழுவதும் மாணவிகளிடம் தவறாக நடந்து கொண்ட, பாலியல் வன்கொடுமை புகார்களில் சிக்கிய ஆசிரியர்களின் விவரம் சேகரிக்கப்பட்டுள்ளதாகக் கூறப்படுகிறது. இதில், தவறிழைத்தவர்கள் மீது பணிநீக்கம் உள்ளிட்ட கடுமையான நடவடிக்கைகளை மேற்கொள்ள கல்வித் துறை முடிவு செய்துள்ளது. பாலியல் புகார்களில் சிக்கிய ஆசிரியர்கள் பட்டியலையும், அவர்கள் மீது எடுக்கப்பட்ட நடவடிக்கை விவரங்களையும் அறிக்கையாக உடனடியாக சமர்ப்பிக்க வேண்டும் என துறை இயக்குநர்களுக்கு அறிவுறுத்தப்பட்டுள்ளது.