அல்-அஸாதுக்கு அடைக்கலம்: உறுதி செய்தது ரஷியா

கிளர்ச்சியாளர்களால் ஆட்சியிலிருந்து அகற்றப்பட்ட சிரியா அதிபர் பஷார் அல்-அஸாதுக்கு தங்கள் நாடு அடைக்கலம் அளித்துள்ளதை ரஷியா உறுதிப்படுத்தியது.

- 

இது குறித்து ரஷிய அதிபர் மாளிகை செய்தித் தொடர்பாளர் டிமித்ரி பெஸ்கோவ் திங்கள்கிழமை கூறியதாவது:

ஆட்சியிலிருந்து அகற்றப்பட்ட சிரியா அதிபர் அல்-அஸாதுக்கு ரஷியா அடைக்கலம் அளித்துள்ளது. அதிபர் விளாதிமீர் புதினின் ஒப்புதலுடன் இந்த முடிவு மேற்கொள்ளப்பட்டது. தற்போது அல்-அஸாத் எங்கு இருக்கிறார் என்பது குறித்த விவரங்களை வெளியிட முடியாது.

அல்-அஸாதை அதிபர் புதின் நேரில் சந்தித்துப் பேச்சுவார்த்தை நடத்தும் திட்டம் இப்போதைக்கு இல்லை.

சிரியாவில் நடைபெற்றுள்ள இந்த ஆட்சிக் கவிழ்ப்பு உலக நாடுகள் அனைத்தையுமே அதிர்ச்சிக்குள்ளாகியுள்ளது. அவ்வாறு அதிர்ச்சியடைந்த நாடுகளில் ரஷியாவும் ஒன்று.

தற்போது சிரியாவில் உள்ள ரஷிய ராணுவ நிலைகளின் பாதுகாப்பு குறித்து அதிக கவனம் செலுத்த வேண்டும். இதற்காக, அங்கு புதிதாக அமையவிருக்கும் அரசுடன் பேச்சுவார்த்தை நடத்துவோம்.

உள்நாட்டுப் போரில் கிளர்ச்சியாளர்களுக்கு உதவிய துருக்கியுடனும் சிரியா விவகாரம் குறித்து ஆலோசனை நடத்துவோம் என்றார் அவர்.