பொதுக்குழுவில் அழகிரி? -மதுரை பரபரப்பு!

தி.மு.க.வின் பொதுக்குழு எப்போதுமே சென்னை அறிவாலயத்தில்தான் நடைபெறும்.

- அண்ணல்

தி.மு.க.வின் 75 வருட வரலாற்றில் இரண்டு முறை மட்டுமே மதுரையில் பொதுக்குழு நடைபெற்றது. 29 ஆண்டுகளுக்குப் பிறகு தற்போது மதுரையில் மீண்டும் பொதுக்குழு நடைபெற உள்ளது.

இந்த பொதுக்குழு ஏற்பாடுகளை அமைச்சர் மூர்த்தியின் கையில் ஒப்படைத்துள்ளது தலைமை. இதன் எதிரொலியாக மதுரை நகரெங்கும் தி.மு.க. கொடிகள் பறக்கின்றன. நிகழ்ச்சி நடைபெறும் ஒத்தக்கடை பகுதியில் அறிவாலய மாடலில் மிகப் பிரம்மாண்டமான அரங்கம் அமைக்கப்படுகிறது. தி.மு.க.வைப் பொறுத்தவரை தமிழகம் எங்குமுள்ள அனைத்து மாவட்டங்களிலிருந்தும் பகுதிச் செயலாளர்களில் ஆரம்பித்து, அனைத்து அணியைச் சேர்ந்த மாவட்ட பொறுப்பாளர்கள் என 10,000 பொதுக்குழு உறுப்பினர்கள், சிறப்பு அழைப்பாளர்கள் பங்குபெறுவார்கள்.

பொதுக் குழுவில் பங்கேற்க முதல் நாளே (மே 31) முதல்வர் ஸ்டாலின் மதுரை வருகிறார். மதுரை மேற்கு, மத்தி, வடக்கு தொகுதிகளில் ரோடு ஷோவில் பங்கேற்கிறார். இந்த ரோடு ஷோ முதல்வரின் அண்ணன் அழகிரி இருக்கும் பகுதியில் தொடங்கி முன்னாள் மேயர் முத்து சிலை திறப்பு விழா, மூக்கையா தேவர் மணிமண்டபம் துவக்க விழா நிகழ்ச்சி என நீள்கிறது.