ક્રિકેટનાં બે નક્ષત્રોનું વિદાયગીત

વિરાટ એટલે અપાર શક્તિ અને અદમ્ય ઉત્સાહનો પર્યાય, જેણે શિસ્ત અને પ્રતિબદ્ધતાથી ક્રિકેટનાં શિખરો સર કર્યાં. બીજી બાજુ, રોહિત એટલે રમતનો રસ અને હિટમૅનની સાહસિકતા, જેણે આક્રમક રમતથી ચાહકોનાં દિલ જીત્યાં. પાંચ દિવસના ગાળામાં આ બે દિગ્ગજોએ ટેસ્ટ ક્રિકેટને અલવિદા કહીને ભારતીય ક્રિકેટના એક યુગનો અંત આણ્યો, પરંતુ એમની સ્મૃતિ અને સિદ્ધિ સદાય ચાહકોનાં હૃદયમાં અંકિત રહેશે.

- નિતુલ ગજ્જર (વડોદરા)

ફાંકડા વ્યૂહબાજ કૅપ્ટન અને ખૂબ સારા બૅટ્સમૅન તરીકે રોહિત શર્માનો ૩૮ વર્ષની વયે પણ રમતમાં જુસ્સો જોવા જેવો હોય છે. જો કે ભારતીય ક્રિકેટ ટીમની ઈંગ્લૅન્ડ ટૂર શરૂ થાય એ અગાઉ સાત મેના દિવસે રોહિતે ટેસ્ટ ક્રિકેટમાંથી અચાનક પોતાની નિવૃત્તિ જાહેર કરીને ચાહકોને જબરો આંચકો આપ્યો.

રોહિતની નિવૃત્તિના સમાચાર તાજા હતા ત્યાં ૧૨ મેએ વિરાટ કોહલીએ પણ ઈન્સ્ટાગ્રામ પર એક ભાવુક પોસ્ટ મૂકીને ટેસ્ટ ક્રિકેટમાંથી સંન્યાસ લેવાનું જાહેર કર્યું. આમ જુઓ તો વિરાટ કોહલી એક આખી પેઢી માટે પ્રેરણાનો સ્રોત પણ છે. આ બન્ને ખેલાડી હવે વન ડે અને આઈપીએલમાં જ રમવાના છે.

કારકિર્દી દરમિયાન રોહિત અને વિરાટ એકસાથે ૧૯૦ ટેસ્ટ મૅચ રમ્યા, જેમાં સાથે મળીને ૪૪ સદી ફટકારી કુલ ૧૩,૫૩૧ રન કર્યા. મેદાનની બહાર પણ વિરાટ કોહલી અને રોહિત શર્મા ખૂબ સારા મિત્રો છે. બૅટ્સમૅન તરીકે એમની જોડી ભારતીય ટેસ્ટ ક્રિકેટ ટીમ માટે કરોડરજ્જુ સમાન હતી.

આમ તો રોહિત ભારતનો હિટમૅન ગણાય, પણ પાછલી છ ટેસ્ટ મૅચમાં એનું ફૉર્મ ખરાબ રહ્યું હતું. એણે કુલ ૧૦ ઈનિંગ્સમાં માત્ર ૧૨૨ રન જ કર્યા હતા. રોહિતની કારકિર્દી આરંભથી જોઈએ તો ૨૦૦૭માં આયરલૅન્ડ સામે એણે પદાર્પણ કર્યું હતું. ૨૦૦૭માં પ્રથમ ટી-ટ્વેન્ટી વર્લ્ડ કપ જીતનારી એમએસ ધોનીની ટીમમાં રોહિત પણ હતો, પરંતુ કોહલી, પૂજારા, ધવન અને રહાણેને જેટલી સરળતાથી ટેસ્ટ ટીમમાં સ્થાન મળ્યું એટલું સરળ રોહિત માટે નહોતું. છેક ૨૦૧૩માં સચીન તેન્ડુલકરની વિદાયશ્રેણીમાં કોલકાતામાં વેસ્ટ ઈન્ડીઝ સામે રોહિતનો ટેસ્ટ ક્રિકેટમાં પ્રવેશ થયો, જેમાં એણે ૧૭૭ રન બનાવ્યા હતા. અલબત્ત, વિદેશની ધરતી પર ખરાબ સ્કોરને કારણે ટેસ્ટ ટીમમાં રોહિતનું સ્થાન ડગુમગુ રહેતું હતું.