ટાવર વગરની આ તે વળી કેવી ઈન્ટરનેટ સેવા?

વર્તમાન ટ્રમ્પ પ્રશાસનના સૌથી વાચાળ અને છેલછોગાળા સભ્ય એવા અમેરિકી ઉદ્યોગપતિ એલોન મસ્ક હવે ભારતમાં પણ ઉપગ્રહ આધારિત અતિ ઝડપી નેટ સર્વિસ શરૂ કરવા ધારે છે. અનેક ઠેકાણે નેટ કનેક્ટિવિટીની સમસ્યા ધરાવતા આપણા દેશમાં આવી સર્વિસ માટે મોટી ડિમાન્ડ ઊભી થઈ શકે, પણ એ સામે આપણે મસમોટી રકમ આપવાની તૈયારી પણ રાખવી પડે.

- નિતુલ ગજ્જર (વડોદરા)

રાત પડ્યે અવકાશદર્શન કરવાનો શોખ ઘણા 2 લોકોને હોય છે. જો કે પાછલાં કેટલાંક વર્ષોથી સૂરજ ઢળવાના સમયે ઘણી વાર આકાશમાં જુઓ તો અચાનક એક, બે, ત્રણ કે ક્યારેક એથી પણ વધુ અજાણ્યા પદાર્થો પસાર થતાં જોવા મળે છે. ક્યારેક મોડી સાંજે તો એકસાથે સેંકડો ઉલ્કા અવકાશમાંથી પસાર થઈ રહી હોય એવો પણ અહેસાસ ઘણા લોકોને થયો છે. ભારતમાં તેમ જ દુનિયાના બીજા વિસ્તારોમાં પાછલાં ત્રણ-ચાર વર્ષમાં આ પ્રકારની ઘટના જોઈ હોય એવો દાવો ઘણા લોકોએ કર્યો છે અને એના વિડિયો પણ વાઈરલ કર્યા છે.

ના, આ કોઈ ચિંતાનો વિષય નથી અને ખરેખર તો પેલા પદાર્થો પણ એટલા અજાણ્યા નથી. આકાશમાં આ રીતે એકસાથે જોવા મળતા આ પદાર્થો અમેરિકાના જાણીતા ઉદ્યોગપતિ અને અત્યારે ટ્રમ્પ પ્રશાસનમાં મહત્ત્વની ભૂમિકા ભજવી રહેલા એલોન મસ્કની કંપની સ્ટારલિન્કના સેટેલાઈટ્સનું ઝુંડ છે, જે ઈન્ટરનેટ સેવા પૂરી પાડવા પૃથ્વી ફરતે ચક્કર માર્યા કરે છે.

આજના આ મૉડર્ન યુગમાં દુનિયામાં ભાગ્યે જ કોઈને ઈન્ટરનેટ વગર ચાલે એમ છે. ઘણાની તો દુનિયા જ ઈન્ટરનેટ પર વસે છે અને નભે છે એવું કહીએ તો એમાંય ખોટું નથી. માટે જ તો હવે ઘણા મોટા ઉદ્યોગપતિઓએ પણ ઈન્ટરનેટ સેવાના વ્યવસાયમાં ઝંપલાવ્યું છે. આપણાં સ્માર્ટફોન કે કમ્પ્યુટર સુધી પહોંચતી ઈન્ટરનેટ સેવા ઘણુંખરું દરિયાના પેટાળમાં બિછાવાયેલા ઑપ્ટિક ફાઈબરના વિશાળ નેટવર્ક થકી સેલ્યુલર ટાવર સુધી આવે છે. ત્યાર બાદ એને ઘરે ઘરે પહોંચાડવાનું કામ સેલ્યુલર ટાવરનું હોય છે. જો કે જંગલમાં, પહાડ પર કે મધદરિયે તો આવા સેલ્યુલર ટાવર હોતા નથી અને એને કારણે આપણને કેટલીક જગ્યાએ મોબાઈલ ફોનમાં નેટ કનેક્શન મળતું નથી.