શરીરની આ ગરમી તો કંઈક અલગ જ છે!

સરેરાશ દર ચારમાંથી ત્રણ સ્ત્રીને સતાવતી ‘હૉટ ફ્લૅશ’ની સમસ્યા વિશે જાણી લો...

- ડૉ. અર્ચના પારસ શાહ

મીના ૪૫ વર્ષની હતી ત્યારથી જ એને હૉટ ફ્લૅશનો અનુભવ થવા લાગેલો. શરૂઆતમાં એ થોડા પ્રમાણમાં આવતા. જો કે એના પિરિયડ્સ અનિયમિત થવાને કારણે અને પાછળથી પિરિયડ બંધ થવાને લીધે એનાં લક્ષણ વધુ દેખાવા લાગ્યાં અને એને દર એક-બે કલાકે હૉટ ફ્લૅશના અનુભવ થવા લાગ્યા.

શિલ્પા નામની ૫૦ વર્ષની મહિલાને અઢી વર્ષ પહેલાં છેલ્લો પિરિયડ આવ્યો હતો. જો કે એણે પહેલી વાર મેનોપોઝનાં લક્ષણ અનુભવવાનું શરૂ ત્યારે એ થોડી મૂંઝવણમાં હતી. શરૂઆતમાં એકાએક પરસેવાથી રેબઝેબ થઈ જવું, ઊંઘમાંથી અચાનક જાગી જવું અને થાક લાગવો જેવાં લક્ષણની એની ફરિયાદ હતી. શરૂઆતમાં તો એને લાગ્યું કે આ કોવિડનાં લક્ષણ છે. એક દિવસ એ સુપર માર્કેટમાં હતી, જ્યાં એને અચાનક ખૂબ જ ગરમી લાગવા લાગી અને એ પરસેવાથી લથપથ થઈ ગઈ.

પછીના દિવસોમાં એ થોડી હતાશ પણ રહેવા લાગી. એ વખતે તો કોવિડ સિવાય બીજી કોઈ બીમારી જાણે અસ્તિત્વમાં જ નહોતી " એટલે એણે પણ માની લીધું કે એ રોગચાળાને કારણે થયું છે. શિલ્પાના ફૅમિલી ડૉક્ટરે એને ગાયનેકોલૉજિસ્ટ પાસે મોકલી ત્યારે એને ખબર પડી કે એનાં લક્ષણ તો મેનોપોઝનો જ એક ભાગ છે.