અમેરિકન ડ્રીમ દુઃસ્વપ્નમાં પલટાઈ રહ્યું છે?

બે જ મહિનામાં નવ ભારતીયોનાં મોત, જેમાં છ સ્ટુડન્ટ્સ...

- કેતન મિસ્ત્રી (મુંબઈ)

૨૩ જાન્યુઆરી, ૨૦૨૪ની સમી સાંજ. ૨૩ વર્ષની જાહ્નવી કંડુલા ૨૩ અમેરિકાના શહેર સીએટલમાં રસ્તો ક્રૉસ કરી રહી છે. ત્યાં કલાકના ૧૧૯ કિલોમીટરની સ્પીડે ધસમસતી પોલીસકારની એને ટક્કર વાગે છે, જાહ્નવી કમ સે કમ ૧૦૦ ફૂટ દૂર ઊછળીને પટકાય છે, તત્કાળ એનું મૃત્યુ થાય છે. પોલીસ અફસર કેવિન ડેવ કોઈ ડ્રગ્સના ઓવરડોઝની તપાસ કરવા જઈ રહ્યો હોય છે. આ એક્સિડન્ટની તપાસ કરવા આવેલો પોલીસ ડેનિયલ ઑર્ડર જાનવીના મોતની મજાક ઉડાવે છે. અકસ્માતના થોડા દિવસ બાદ બહાર આવેલા વિડિયો-ઑડિયોમાં પોલીસ અફ્સર કહે છેઃ યાર, હવે શું? એ ઑલરેડી મરી ગઈ છે, ૨૬ની તો હતી, કેટલું જીવવાની હતી? ૧૧,૦૦૦ ડૉલરનો ચેક લખી આપો એટલે વાત પતી જાય, બીજું શું?

હવે જરા આ જુઓ, માંડ વીસીમાં પ્રવેશેલા ગટ્ટુ દિનેશ અને નિકેશ, કનેટિક્ટની સેક્રેડ હાર્ટ યુનિવર્સિટીમાં ઉચ્ચ અભ્યાસાર્થે ૨૧ જાન્યુઆરીએ અનુક્રમે તેલંગણ અને આંધ્ર પ્રદેશથી અમેરિકા પહોંચે છે. છ ફેબ્રુઆરીએ બન્નેની લાશ એમના ઍપાર્ટમેન્ટમાંથી મળે છે. કાતિલ ઠંડીથી બચવા ચલાવવામાં આવતા રૂમ હીટરમાંથી વછૂટેલા કાર્બન મોનોક્સાઈડથી બન્નેનાં મોત થયાં. માંડ ૧૬ દિવસનો અલ્પજીવી અમેરિકાનિવાસ જીવલેણ નીવડ્યો... આ કિસ્સો જરા જૂનો છે, પણ પ્રાસંગિક છે. ૩૨ વર્ષનો એન્જિનિયર શ્રીનિવાસ પત્ની સાથે અમેરિકાના કૅન્સાસમાં હજી તો મૂવ થયો જ હોય છે. ૨૦૧૭ના ફેબ્રુઆરીમાં કૅન્સાસ સિટીના એક બારની બહાર કોઈ ધોળિયાએ એને ગોળીએ દઈ દીધો. રિવૉલ્વરનું ટ્રિગર દબાવતાં પહેલાં એ અમેરિકને રાડ નાખેલીઃ ગેટ આઉટ ઑફ માય કન્ટી.

આજે આવી ઘટનાઓનું પુનરાવર્તન થઈ રહ્યું છે. અમેરિકામાં ભણતા કે નોકરી કરતા લોકો પર મોતના ઓળા મંડરાઈ રહ્યા છે. ૨૦૨૪ના માત્ર પચાસેક દિવસમાં અમેરિકામાં ભારતીયો નાં, ખાસ કરીને જવાન છોકરા-છોકરીનાં મોતના બનાવ એ હદે વધી પડ્યા કે વ્હાઈટ હાઉસે ઘોર નિદ્રામાંથી સફાળા જાગીને ખુલાસો કરવો પડ્યો કે અમેરિકામાં જાતિ કે ધર્મ આધારિત કે કોઈ પણ પ્રકારની હિંસા સ્વીકાર્ય નથી. આવા હુમલા, હત્યા ખાળવા અમે પૂરતા પ્રયાસ કરી રહ્યા છીએ. નવા વર્ષના બે જ મહિનામાં નવ ભારતીયોનાં મોત થયાં, જેમાં છ વિદ્યાર્થી છે.