સૌરાષ્ટ્ર હવે ભરશે વિકાસની ઊંચી ઉડાન..

રાજ્યના સૌથી લાંબા રન-વે સાથેનું રાજકોટનું નવું આંતરરાષ્ટ્રીય ઍરપોર્ટ ગુજરાતનું પહેલું ગ્રીનફીલ્ડ વિમાની મથક પણ છે. સંભવિત દિવાળી પહેલાં સૌરાષ્ટ્રવાસીઓ અહીંથી જ દેશ બહાર ઊડી શકશે.

- દેવેન્દ્ર જાની (રાજકોટ)

વિસ્તારની દૃષ્ટિએ આ છે ગુજરાતનું સૌથી મોટું વિમાનમથક. એનો રન-વે પણ ગુજરાતનાં બીજાં કોઈ પણ ઍરપોર્ટ કરતાં મોટો-લાંબો છે. ઍરપોર્ટ સંકુલમાં સોલાર પાવર સિસ્ટમ ગોઠવવામાં આવી છે અને વરસાદી પાણીના સંગ્રહ માટે વૉટર હાર્વેસ્ટિંગ સિસ્ટમ પણ છે.

આ છે હિરાસર એટલે કે રાજકોટનું નવું ઍરપોર્ટ. રાજકોટથી ચોટીલા તરફના હાઈ–વે પર ત્રીસેક કિલોમીટરના અંતરે બામણબોર પછી આવે હિરાસર ગામ. હજી છ વર્ષ પહેલાં અહીં ડુંગરાળ અને વેરાન જગ્યા જોવા મળતી હતી. એ સ્થળે આજે આધુનિક સુવિધાથી સજ્જ ગુજરાતનું પ્રથમ ગ્રીનફીલ્ડ ઈન્ટરનૅશનલ ઍરપોર્ટ ઊભું થયું છે. ગયા ગુરુવાર (૨૭ જુલાઈએ) વડા પ્રધાન નરેન્દ્ર મોદીએ એનું લોકાર્પણ કર્યું. ઑક્ટોબર, ૨૦૧૭માં આ સ્થળ પસંદ કરીને વડા પ્રધાને જ એનું ખાતમુહૂર્ત કર્યું હતું. એના ઉદ્ઘાટન સાથે રાજકોટ હવે આંતરરાષ્ટ્રીય સ્તરે ઍર કનેક્ટિવિટી ધરાવતું શહેર બની જવાનું છે.

શૂન્યમાંથી સર્જન કરીને એટલે કે ગ્રાઉન્ડ ઝીરોથી આખી વિકાસપ્રક્રિયા કરવામાં આવી હોય અને જેના નિર્માણ સમયે પર્યાવરણ જાળવણીની પૂરતી કાળજી લેવામાં આવી હોય એને ગ્રીનફીલ્ડ ઍરપોર્ટ તરીકે ઓળખવામાં આવે છે. રાજકોટ એ હિસાબે ગુજરાતનું પહેલું ગ્રીનફીલ્ડ ઍરપોર્ટ પણ બન્યું છે.

ગુજરાતનો સૌથી લાંબો રન-વે ધરાવતું રાજકોટનું નવું વિમાની મથક સોલાર પાવર સિસ્ટમ અને વૉટર હાર્વેસ્ટિંગ સિસ્ટમથી પણ સજ્જ છે.

ગ્રીનફીલ્ડ ઍરપોર્ટની નીતિ હેઠળ અત્યાર સુધી ગુજરાતનાં બે સહિત દેશમાં કુલ અગિયાર ઍરપોર્ટને મંજૂરી મળી છે. ગુજરાતમાં રાજકોટ (હિરાસર) ઉપરાંત ધોલેરામાં નિર્માણ પામનારું ઍરપોર્ટ પણ ગ્રીનફીલ્ડ હશે.