ChatGPT દરેક સવાલનો જવાબ આપતું કમાલનું સૉફ્ટવેર

ટેક્નોલૉજી દિવસે દિવસે ઍડ્વાન્સ થતી જાય છે અને હવે તો માણસની કમી પૂરી કરી આપે એવા પણ અમુક વિકલ્પ ઉપલબ્ધ છે. એવા જ એક વિકલ્પ વિશે વાંચો આ લેખમાં.

- નિતુલ ગજ્જર (વડોદરા)

ધારો કે નવરા બેઠા આપણા મનમાં વિચાર આવે કે ચીનમાં જોવા મળતું પાંડા નામનું પ્રાણી પણ ત્યાંની પ્રજાની જેમ લૅબમાં પરીક્ષણ કરતું હોય તો કેવું લાગે? માત્ર એટલું જ નહીં, ઘડીભર માટે આવેલા આ વિચિત્ર વિચારનું કોઈ પળવારમાં ચિત્ર દોરી આપે તો કેવી મજા પડે? અથવા તો આપણને કંઈક પૂછવાનું મન થાય, પણ આસપાસ કોઈ ન હોય અને આપણા સવાલનો જવાબ આપણો મોબાઈલ ફોન જ આપી દે તો કેવું લાગે?

જેની કલ્પના માત્રથી મજા પડી જાય એવા આ વિચાર વાસ્તવિકતામાં બદલાઈ જાય એ હવે શક્ય છે.. અને એ પણ આંગળીનાં ટેરવે.

વર્તમાન યુગમાં વિજ્ઞાનને કારણે જમાનો હવે બદલાયો છે. દિવસે દિવસે મૉડર્ન થતી જતી ટેક્નોલૉજીની આ દુનિયામાં હવે આર્ટિફિશિયલ ઈન્ટેલિજન્સ (AI)નો ઉપયોગ વ્યાપક થયો છે, જેને કારણે ક્યારેય વિચાર્યું પણ ન હોય એવાં કામ કમ્પ્યુટર, આઈ-પૅડ કે નોટબુક જેવાં ટેબ્લેટ અને મોબાઈલ ફોન જેવાં ગેજેટ પળવારમાં કરી આપે છે. સામાન્ય માણસને એવું લાગે કે AI એ માત્ર ઈન્ફોર્મેશન ટેક્નોલૉજીનો કોઈ ભાગ છે અને એનાથી અમુક મર્યાદિત ક્ષેત્રના લોકોને ફાયદો થાય છે, પણ ના, એવું નથી. AI હવે આપણામાંથી અનેકનાં જીવનનું અભિન્ન અંગ છે.

આર્ટિફિશિયલ ઈન્ટેલિજન્સ કોઈ નવો કૉન્સેપ્ટ નથી. આજથી દાયકા પહેલાંથી ઉપયોગમાં લેવાતી A। ટેક્નોલૉજી આપણને ઘણી રીતે મદદરૂપ થાય છે.. અને હવે તો એના વધુ અસરકારક વિકલ્પ આપણી વચ્ચે ઉપલબ્ધ છે.

A। ટેક્નોલૉજીનો આવો જ એક નમૂનો અત્યારે ચર્ચાનો વિષય બન્યો છે. એલન મસ્ક, માર્ક ઝકરબર્ગ જેવા દુનિયાના કેટલાક જાણીતા લોકો દ્વારા પણ જેનાં વખાણ કરવામાં આવ્યાં છે એ A। સૉફ્ટવેરનું નામ છે ChatGPT. મૂળ અમેરિકન કંપની OpenAI દ્વારા લૉન્ચ કરવામાં આવેલા ChatGPT સૉફ્ટવેરની ખાસિયત એ કે એની પાસે લગભગ દરેકેદરેક સવાલનો જવાબ છે. એ સિવાય પણ ChatGPTની કેટલીક રસપ્રદ વિશેષતા છે, જેમ કે આપણા સવાલના જવાબ આપવા ઉપરાંત આપણને કોઈ વિષય પર લખવાનો કંટાળો આવતો હોય તો ChatGPT પાસે એ કામ પણ કરાવી શકાય છે!