કોવિડનું ભૂત.. લૉકડાઉનનું તૂત

એક પણ કોરોના પોઝિટિવ પેશન્ટ હોય ત્યાં સુધી આખેઆખા એરિયાને સીલ કરી દેવાની ચીન સરકારની ઝીરો કોવિડ પૉલિસી સામે પ્રજાએ વિદ્રોહ કર્યો છે. ઠેર ઠેર પ્રદર્શન અને પોલીસ સાથે મૂઠભેડના માહોલમાં ચીનની સરકાર, ખાસ તો પ્રમુખ સી જિનપિંગની પ્રતિષ્ઠા ખરડાઈ રહી છે. વર્ષો પછી પહેલી વાર ચીનમાં સરકાર સામે વિરોધનાં દૃશ્યો બહારની દુનિયાને જોવા મળ્યાં છે.

- સમીર પાલેજા (મુંબઈ)

૪૦,૦૦૦...

આ અંક તમારા હાથમાં આવશે ત્યારે આંકડો કદાચ વધી ગયો હશે. ચીનમાં કોવિડે ફરી માથું ઊંચક્યું છે એની સાથે સરકારની ઝીરો કોવિડ પૉલિસી તથા આકરા લૉકડાઉનની સામે સામાન્ય પ્રજા પણ માથું ઊંચકતી જાય છે.

પાછલા દિવસોમાં ચીનની ઉદ્યોગ નગરી જાંગઝુમાં ફોક્સકોનની વિશાળ આઈફોન ફૅક્ટરીના કામદારોએ પોલીસ સાથે બાથંબાથી કરી એ ન્યૂઝ ચર્ચામાં રહ્યા. જંગુહા યુનિવર્સિટીમાં તો સ્ટુડન્ટ્સ હૉસ્ટેલમાં ચીની પ્રમુખ સી જિનપિંગને સંબોધીને ભૂંડી ગાળો લખાયેલાં બોર્ડ લગાડવામાં આવ્યાં. પાટનગર બીજિંગમાં વિદેશી એલચી કચેરીઓ આવેલી છે એ ચાઓયાંગ ઉપનગરમાં હજારો સ્ટુડન્ટ્સ ઝીરો કોવિડ પૉલિસીના વિરોધમાં મોરચા કાઢી રહ્યા છે.

આ તમામ ઘટનાના અહેવાલ-ફોટો-વિડિયો સરકારી સેન્સરશિપના લોખંડી દરવાજાની બહાર છટકીને વિશ્વનાં મિડિયામાં, ખાસ તો સોશિયલ મિડિયામાં પ્રસારિત થઈ રહ્યા છે. આવી ઘટનાનું રિપોર્ટિંગ કરનારા બીબીસીના પત્રકારને ચીની પોલીસે મેથીપાક આપીને હાથકડી પહેરાવીને કેટલાક કલાક માટે અંદર કરી દીધો એટલે દુનિયાઆખીનાં પ્રસાર માધ્યમોએ ચીની પ્રજાના મિનિ બળવાની નોંધ લેવા માંડી.

નવેમ્બરની શરૂઆતમાં ચીનના ગ્યાનસ રાજ્યમાં લૉકડાઉન દરમિયાન એક ઘરમાં અકસ્માતે ચૂલાનો ગૅસ લીક થયો. માએ પોતાના બાળકને હૉસ્પિટલમાં લઈ જવા દોડાદોડી કરી મૂકી, પણ લૉકડાઉનને કારણે હૉસ્પિટલમાં ન પહોંચી શક્યાં એમાં બાળક મરી ગયું. બાળકના પિતાએ સોશિયલ મિડિયામાં ગાઈ-વગાડીને કહ્યું કે મારા બાળકે ત્રણ વર્ષમાં માત્ર ને માત્ર કોવિડ ને ક્વૉરન્ટીન જ જોયાં ને છેવટે લૉકડાઉન એને ભરખી ગયો.

આ માતા-પિતાની ઈમોશનલ વાતોએ સામાન્ય પ્રજાના રોષને ચિનગારી આપી. જાંગડુ શહેરમાં કોવિડનો ચેપ ડામી દેવા માટે સરકારે પાંચ દિવસનું લૉકડાઉન જાહેર કરીને ૬૦ લાખ નાગરિકોને ઘરમાં પુરાઈ રહેવાનો આદેશ આપ્યો, એમાં મોટી બબાલ થઈ. પોલીસ ગમે એને પકડીને ટેસ્ટ કરે, ક્વૉરન્ટીનમાં મૂકી દે એની સામે લોકોનો વિરોધ હતો.