મહારાષ્ટ્ર-રાજસ્થાનઃ વાત બે બગાવતની..

શિવસેના એ નામ અને એનું ધનુષ્ય-બાણનું ચૂંટણીપ્રતીક કોણ રાખે એ મુદ્દે ન્યાયતંત્ર કે ચૂંટણીપંચે અંતિમ નિર્ણય આપતાં અગાઉ લાંબી કાનૂની લડતના સાક્ષી બનવું પડશે

- 

મરાઠીભાષિકોની અસ્મિતાના નામે ૧૯૭૦ના દાયકામાં મહારાષ્ટ્રમાં સ્થપાયેલી શિવસેનાએ એના સાડા પાંચ દાયકાની સફરમાં ન અનુભવ્યો હોય એવો ફટકો આ ચોમાસાના આરંભે ખમવો પડ્યો. છગન ભુજબળથી માંડી નારાયણ રાણે જેવા પાયાના શિવસૈનિકો અને ખુદ સ્થાપક બાળાસાહેબ ઠાકરેના ભત્રીજા રાજ ઠાકરે પક્ષ છોડી ગયા એના કરતાંય મોટું નુકસાન સેનાના ભાગે આવ્યું. ગોળા સાથે ગોફણ જાય એમ ૪૦ વિધાનસભ્યો એકસાથે પક્ષમાંથી નીકળી ગયા અને પરિણામે મહારાષ્ટ્રમાં સેનાએ સત્તા પણ ગુમાવવી પડી.

એક તો પહેલી વાર ઠાકરેપરિવારનો કોઈ સભ્ય મહારાષ્ટ્રમાં સત્તારૂઢ થયો હતો અને એમ છતાં બાળ ઠાકરેની જ વિચારસરણીના નામે શિવસેનાની સરકાર સામે બળવો થયો. સેનાના બે ટુકડા થયા. મહારાષ્ટ્રમાં ચોમાસા પછી પણ છૂટોછવાયો વરસાદ ચાલુ છે ત્યારે હમણાં સેનાના આ બે ટુકડા વચ્ચેના વિખવાદમાં પહેલો પડાવ આવ્યો છે.