બાળપણનાં સંભારણાં, જાણે ઊઘડતાં જીવનનાં બારણા.. પ્રતીક ગાંધી મુંબઈ

આ કલાકારનો પરિચય આપવો એ સૂરજ સામે મીણબત્તી ધરવા જેવો વ્યર્થ વ્યાયામ છે. રંગભૂમિ, ગુજરાતી-હિંદી ફિલ્મ તથા વેબ-શોમાં છવાઈ ગયેલા પ્રતીકનો માતૃભાષા સાથેનો સંબંધ અનેરો અને અતૂટ છે.

- 

શિક્ષણ સાથે સંકળાયેલાં માતા-પિતાના સંતાન પ્રતીક ગાંધીનું બાળમંદિરથી બારમા ધોરણ સુધીનું માતૃભાષામાં ભણતર થયું સુરતના પ્રખ્યાત ચંદ્રવદન ચુનીલાલ શાહે સ્થાપેલા જીવન ભારતી પ્રવૃત્તિ વિદ્યાલયમાં. પ્રતીક કહે છે કે અમારી શાળામાં ઈતર પ્રવૃત્તિને એ હદે મહત્ત્વ આપવામાં આવતું કે બીજા વિષયોની જેમ એમાં પાસ થવું પડે, નહીંતર આગળના ધોરણમાં જઈ ન શકાય.

ખેતીકામ, સુથારીકામ, વાંસકામ, વણાટકામ, સીવણ, સંગીત, વગેરે પ્રવૃત્તિ વિશે પ્રતીક કહે છેઃ ‘વરસ દરમિયાન કઈ સીઝનમાં શેનો પાક લેવાય એની અમને સમજણ આપવામાં આવતી. પાક આવતાં અમને કોથમીર, મરચાં, વગેરે આપવામાં આવતાં. અમે ઉગાડેલાં શાકભાજી અમને મળતાં તો રાજપાટ મળ્યા જેવી અનુભૂતિ થતી. સુથારીકામમાં ટેબલ-ખુરસી બનાવતા. સંગીતમાં હાર્મોનિયમ વગાડવાની તથા વિવિધ રાગની સમજણ આપવામાં આવતી. રોજ સવારે સૂર-તાલ સાથે સમૂહમાં પ્રાર્થના ગાતા. આ આ ઉપરાંત, પડિસવારી, જિમ્નેસ્ટિક, ક્રિકેટ જેવી રમતગમત પણ ખરી.’