આ મોડર્ન સર્જરી આપી રહી છે પાર્કિન્સન્સથી રાહત

છેલ્લાં થોડાં વર્ષથી ડીપ બ્રેન સ્ટિમ્યુલેશન સર્જરીથી કંપવાનાં તીવ્ર લક્ષણોને નિયંત્રિત કરવામાં મળી રહી છે અસાધારણ સફળતા...

- કેવલ મહેતા

‘કોકિલાબહેન અંબાણી હૉસ્પિટલ’ના ડૉ. અક્ષત કયાલઃ પાર્કિન્સન્સની સમસ્યા દવાથી કન્ટ્રોલમાં ન આવે એવા સંજોગમાં ડીબીએસ સર્જરીની ભલામણ કરવામાં આવે છે.

મનોજ માંડ સત્તર વર્ષનો હશે ને એને એક ગંભીર શારીરિક સમસ્યા વળગી. એના શરીરના મસલ્સ વિચિત્ર રીતે વર્તતા હતા, જેને કારણે એનું હલનચલન ડિફોર્મેટિવ એટલે કે વિકૃત બની ગયું. ચાલવા જાય તો બૅલેન્સ ગુમાવે, ઊભો હોય તો અચાનક ઢળી પડે. બીજા શબ્દોમાં એના હલનચલન પર એનો કાબૂ રહે નહીં. નિષ્ણાતોએ નિદાન કર્યુંઃ પ્રાઈમરી ડિસ્ટોનિયા. પરિસ્થિતિ એવી આવી ગઈ કે એ ભણવા પણ જઈ ન શકે. એનો અભ્યાસ અટકી પડ્યો. આખો દિવસ ઘરમાં સતત કોઈની નજર હેઠળ રહેવું પડે, રોજિંદાં કાર્યો માટે કોઈની સહાય લેવી પડે, જેના લીધે એ લગભગ ઉદાસીની ગર્તામાં ધકેલાઈ ગયો...

હાલ મનોજની વય છે એકવીસ. એ સંપૂર્ણ સાજો છે, વ્યવસ્થિત ચાલી શકે છે, એણે ફરી અભ્યાસ શરૂ કરી દીધો છે. મનોજની સમસ્યા દૂર કરનાર ઉપચારનું નામ છેઃ ડીપ બ્રેન સ્ટિમ્યુલેશન (ડીબીએસ) સર્જરી. મનોજ પર આ સર્જરી કરી એને નવજીવન આપનાર મુંબઈસ્થિત કોકિલાબહેન ધીરુભાઈ અંબાણી હૉસ્પિટલ (કેડીએએચ)ના ન્યુરોસર્જ્યન ડૉ. અક્ષત કયાલ ચિત્રલેખાને કહે છેઃ પ્રાઈમરી ડિસ્ટોનિયા એ એક ન્યુરોલૉજિકલ ડિસઑર્ડર છે, જેના લીધે વ્યક્તિ પાંગળી બની જાય, એનું હલનચલન ઍબ્નૉર્મલ (વિકૃત) બની જાય, હલનચલન પર કાબૂ ન રહે. આ એક આનુવંશિક બીમારી છે. ડીબીએસ સર્જરીથી અમે મનોજને સંપૂર્ણ સાજો કરી શક્યા. ડીબીએસ સર્જરી અમુક બ્રેન ડિસઑર્ડર (મસ્તિષ્કની અંદર ઉદ્ભવેલા વિકાર)માં પણ રાહત આપે છે, જેમાં પાર્કિન્સન્સ ડિસીઝ મુખ્ય છે'