હવે સ્વાદ અને સારવાર બન્ને મોંઘાં

કોરોના મહામારીમાંથી માંડ બેઠા થઈ રહેલા સામાન્ય લોકોનાં ઘરનાં અર્થતંત્રને વધારાના જીએસટી રૂપે જબ્બર માર પડવાનો છે. આ ટૅક્સને કારણે સરકારની આવક વધશે, પણ સાથે સાથે સરેરાશ ભારતીયની આર્થિક સમસ્યા પણ ઉપર જશે.

- જ્વલંત છાયા (રાજકોટ)

મોંઘવારી નવી વાત નથી, પરંતુ નવી નવી વસ્તુ મોંઘી થઈ રહી છે એનું આશ્ચર્ય પણ છે અને લોકોને એનો વસવસો પણ છે. જીએસટી અર્થાત્ ગુડ્સ ઍન્ડ સર્વિસ ટૅક્સની શરૂઆત જુલાઈ, ૨૦૧૭માં થઈ ત્યારથી આજ સુધી એ માળખું સતત સળવળતું રહ્યું છે. સરકારને કોરોના કાળ પછી પણ વિક્રમજનક આવક થઈ છે એ સારી અને અલગ બાબત છે, પરંતુ જેને આપણે સામાન્ય પ્રજા કહીએ છીએ એનાં ખિસ્સાં પર જીએસટી સતત ભારે પડી રહ્યો છે.

જીએસટીનો અમલ અને એની વસૂલાત તો અડધા દાયકાથી અમલમાં છે, છતાં આજે એની ચર્ચા વધારે છે અને ક્યાંક છૂટક વિરોધ કે આંદોલન પણ થયાં છે. જે ફેરફાર થયા છે એ ચાલુ રહેશે કે એની પુનઃ વિચારણા થશે એ મહત્ત્વનું નથી, લોકોની દૃષ્ટિએ અગત્યનું એ છે કે અત્યંત જરૂરી વસ્તુ પણ હવે આ કરમાળખામાં છે. સરકારી કર્મચારીઓને દર છ મહિને મોંઘવારી ભથ્થાંનો વધારો મળે, એ સિવાય જે લોકો છે એમની આવક એટલી બધી વધી નથી જેટલો આ ટૅક્સને લીધે એમના પર બોજો આવવાનો છે. જેને આપણે મોજશોખની વસ્તુ કહીએ છીએ એના પર કોઈ પણ પ્રકારનો ટૅક્સ વધે તો સમજી શકાય, પરંતુ ઘરમાં જેના વગર એકાદ ટંક પણ ચાલે એમ ન હોય એવી અનેક ચીજ પણ હવે મોંઘી થશે.