ബംപർ ലോട്ടറി സൃഷ്ടിക്കണം കൂടുതൽ കോടീശ്വരൻമാരെ ലക്ഷാധിപതികളെ

കൂടുതൽ പേർക്ക് നേട്ടം ഉറപ്പാക്കുംവിധം നിലവിലെ ബംപർ ലോട്ടറി സമ്മാനഘടന പൊളിച്ചെഴുതി കേരളാ ഭാഗ്യക്കുറിയെ നീതിയുക്തമാക്കാനുള്ള മനോരമ സമ്പാദ്യത്തിന്റെ നിർദേശമാണിത്. ലോട്ടറി വാങ്ങുന്നവർക്കും വിൽക്കുന്നവർക്കും നേട്ടസാധ്യത പലമടങ്ങ് വർധിപ്പിക്കുന്നതിനൊപ്പം നടത്തിപ്പുകാരായ സംസ്ഥാന സർക്കാരിനു നഷ്ടമൊന്നും സംഭവിക്കാതെ തന്നെ പ്രതിച്ഛായ വർധിപ്പിക്കാനും ഇത് അവസരം ഒരുക്കുമെന്നു പ്രതീക്ഷിക്കാം.

- രാജ്യശ്രീ എസ്.

ഇക്കഴിഞ്ഞ ഓണം ബംപർ ലോട്ടറിയിൽ 66 ലക്ഷത്തിലധികം ടിക്കറ്റുകൾ 500 രൂപ മുടക്കി വാങ്ങിയവരിൽ ഓരോരുത്തരും സ്വപ്നം കണ്ടത് ആ 25 കോടി തനിക്കു സ്വന്തമാകുമെന്നാണ്. എന്നാൽ, ആ ഭാഗ്യം ഒരേ ഒരു വ്യക്തിക്കു മാത്രമാണെന്ന് ടിക്കറ്റ് വിറ്റവർക്കും വാങ്ങിയവർക്കും എല്ലാം അറിയാം. നറുക്കെടുപ്പു ഫലത്തോടൊപ്പം 25 കോടി രൂപ അടിച്ച ഭാഗ്യവാനെക്കുറിച്ചുള്ള വാർത്തകൾ വന്നതോടെ ബാക്കിയുള്ളവർ നിരാശയുടെ പടുകുഴിയിലേക്ക് വീണു. ആ കൊടും നിരാശയുടെ പ്രതിഫലമായി ഒന്നാം സമ്മാനം നേടിയ ആൾക്ക് പുറത്തേക്കു ഇറങ്ങാൻ പോലും പറ്റാത്ത സാഹചര്യം ഉരുത്തിരിഞ്ഞു.

നമ്മുടെ സമൂഹത്തിന് ഇതെന്തു പറ്റി എന്ന് എല്ലാവരും പരിതപിച്ചു. ദശലക്ഷക്കണക്കിനു പേരെ നിരാശരും അസൂയാലുക്കളും ആക്കി മാറ്റുന്ന ഈ ലോട്ടറി എന്തിന് എന്ന ചോദ്യവും ഉയർന്നു. സംസ്ഥാന സർക്കാരിനു ഭാഗ്യക്കുറി നടത്തിപ്പിൽനിന്നു പിറകോട്ടു പോകാനാകില്ല എന്നതു അംഗീകരിക്കാം. പക്ഷേ, നിലവിലെ സംവിധാനത്തിൽ അൽപം മാറ്റം വരുത്തി കൂടുതൽ പേർക്ക് ഉയർന്ന തുക ഉറപ്പാക്കുന്ന സമ്മാനഘടന സ്വീകരിച്ചു കൂടേ എന്നതാണ് ഇവിടെ മുന്നോട്ടു വയ്ക്കുന്ന ആശയം. അൽപം യുക്തിസഹമായി, ന്യായമായ രീതിയിൽ സമ്മാനങ്ങളിൽ മാറ്റം വരുത്തിയാൽ കേരളാ ഭാഗ്യക്കുറി കൂടുതൽ പേർക്ക് ഗുണകരമാകും. അത്തരത്തിൽ കേരളാ ബംപർ ഭാഗ്യക്കുറികളെ സൂപ്പർ ബംപറുകളാക്കാനുള്ള ഒരു പാക്കേജാണ് മനോരമ സമ്പാദ്യം മുന്നോട്ടു വയ്ക്കുന്നത്.

ബംപർ ലോട്ടറികളുടെ ചില പോരായ്മകൾ സമ്മാനങ്ങൾ വീതിച്ചു നൽകുന്നതിലൂടെ എങ്ങനെ വലിയൊരളവോളം പരിഹരിക്കാമെന്നും കവർ സ്റ്റോറി പരിശോധിക്കുന്നു. സമ്മാനത്തുക കുറച്ചാൽ ബംപർ ലോട്ടറിയുടെ ആകർഷണീയത ഇല്ലാതാകുമെന്നും വിൽപന കുറയുമെന്നുമാണ് അധികൃതർ ഉന്നയിക്കുന്ന ആശങ്ക. അതിൽ വാസ്തവം ഇല്ലാതില്ല. പക്ഷേ, ബംപർ ലോട്ടറിയുടെ പരസ്യത്തിനായി നിലവിൽ ചെലവാക്കുന്ന തുക കൊണ്ടു ഫലപ്രദമായി ബോധവൽക്കരണം നടത്തിയാൽ ഈ പ്രശ്നം മറികടക്കാനും ടിക്കറ്റ് വിൽപന മെച്ചപ്പെടുത്താനും കഴിയും എന്നാണ് ഈ രംഗത്തുള്ളവർ തന്നെ ചൂണ്ടിക്കാട്ടുന്നത്.

പണം മുടക്കിയ ഭാഗ്യശാലിക്ക് 12.8 കോടി കേന്ദ്രസർക്കാരിന് 10 കോടി!