അരങ്ങിലും അണിയറയിലും പ്രതിസന്ധികളുമായി നടികർ

നിരവധി കൗതുകങ്ങൾ സമ്മാനിച്ചു കൊണ്ട് ഒരുങ്ങുന്ന ചിത്രമാണ് നടികർ. ലാൽ ജൂനിയർ സംവിധാനം ചെയ്യുന്ന ഈ ചിത്രത്തിലെ കേന്ദ്രകഥാപാത്രത്തെ അവതരിപ്പിക്കുന്നത് ടൊവിനോ തോമസ്സാണ്.

- വാഴൂർ ജോസ്

വലിയ മുതൽമുടക്കിലാണ് ഈ ചിത്രം ഒരുങ്ങുന്നത്. നാൽപ്പതുകോടിയോളം രൂപയാണ് മുതൽമുടക്ക്. നൂറ്റിയിരുപതുദിവസത്തോളം നീണ്ടുനിന്ന ചിത്രീകരണവും വേണ്ടി വന്നു.

കൊച്ചി, ദുബായ്, മൂന്നാർ, ഹൈദ്രാബാദ്, കാഷ്മീർ എന്നിവിടങ്ങളിലായിരുന്നു ചിത്രീകരണം. ഗോഡ്സ് സ്പീഡ് ആന്റ് മൈത്രി മൂവി മേക്കേഴ്സിന്റെ ബാനറിൽ നവീൻ യേർതേനി, വൈ. രവിശങ്കർ, അലൻ ആന്റണി, അനൂപ് വേണുഗോപാൽ എന്നിവരാണ് ഈ ചിത്രം നിർമ്മിക്കുന്നത്.

പുഷ്പ പോലെ വൻകിട ചിത്രങ്ങൾ നിർമ്മിച്ചുപോരുന്ന കമ്പനിയാണ് മൈത്രി മൂവി മേക്കേഴ്സ്. ഇവരുടെ ആദ്യമലയാള ചിത്രം കൂടിയാണിത്.

നടികർ തിലകം നടികർ ആയി

നടികർ തിലകം എന്ന പേരിലാണ് ഈ ചിത്രത്തിന്റെ ചിത്രീകരണം ആരംഭിച്ചത്. ഈ ടൈറ്റിൽ വളരെ പ്രചുരപ്രചാരം നേടുകയുണ്ടായി. നടികർ തിലകം എന്ന പേര് ഏറെക്കാലമായി പ്രേക്ഷകർ നൽകി ബഹുമാനിക്കുന്ന അനശ്വരനായ ശിവാജി ഗണേശന്റെ കുടുംബത്തിൽ നിന്നും നടികർ തിലകം എന്ന പേര് മാറ്റിയാൽ കൊള്ളാം എന്ന അഭിപ്രായം വന്നത് ഈ സമയത്താണ്. അതോടെ ബന്ധപ്പെട്ടവർ അതിനെ ഉൾക്കൊണ്ടുകൊണ്ട് നടികർ തിലകം എന്ന പേരിൽ മാറ്റം വരുത്തി നടികർ എന്നുമാത്രമാക്കി.