ഇരിങ്ങാലക്കുടക്കാരൻ നിഷ്കളങ്കൻ

ലാൽ സലാം

- ലാൽ

'റാംജിറാവു സ്പീക്കിങ്' തകർത്തോടുന്ന കാലം. അഭിനന്ദനം അറിയിച്ചുകൊണ്ട് വരുന്ന ഒത്തിരി കത്തുകൾ. അതിൽ ഒരു കത്ത് വളരെ രസകരമായി തോന്നി. ഇരിങ്ങാലക്കുടക്കാരൻ നിഷ്കളങ്കൻ കലക്കി' എന്നായിരുന്നു കത്തിന്റെ തലക്കെട്ട്. പിന്നെ ഇന്നസെന്റേട്ടന്റെ അഭിനയത്തെക്കുറിച്ചും സിനിമയെക്കുറിച്ചും തമാശകളെക്കുറിച്ചുമൊക്കെ വളരെ രസകരമായൊരു കുറിപ്പും. താഴെ എഴുതിയ ആളുടെ പേരും അഡ്രസും. ആ ആഴ്ചയിലെ പരസ്യമായി ഈ കത്തും അഡ്രസുമാണ് ഞങ്ങൾ പത്രങ്ങളിൽ കൊടുത്തത്.

ഈ സംഭവത്തിനുശേഷം ഒരു മാസത്തോളം കഴിഞ്ഞ്, ഉയരം കുറഞ്ഞ് സുമുഖനായ ഒരാൾ ഞങ്ങളെ കാണാനെത്തി. അപരിചിതനായ അയാൾ സ്വയം പരിചയപ്പെടുത്തി

“ഞാൻ ഒരു നിർമാതാവായിരുന്നു. രണ്ടുമൂന്ന് ചിത്രങ്ങളുടെ പേരും പറഞ്ഞു. എല്ലാം വലിയ ഹിറ്റായ ചിത്രങ്ങൾ. മാത്രമല്ല, ചില ചിത്രങ്ങളുടെ കഥയും അദ്ദേഹത്തിന്റേതായിരുന്നു. ഞങ്ങൾ അദ്ദേഹത്തെ സ്വീകരിച്ചിരുത്തി.