மருத்துவச் சுற்றுலாவில் கலக்கும் இந்தியா...

உலகளாவிய மருத்துவச் சுற்றுலாத்துறையில் வேகமாக வளர்ந்து வரும் நாடாக இந்தியா திகழ்கிறது.

- த.சக்திவேல்

ஆம்; வருகிற 2030ம் வருடத்துக்குள் இந்தியாவில் மருத்துவச் சுற்றுலா சந்தையின் மதிப்பு இரட்டிப்பாகும் என்று மத்திய அரசு தெரிவித்துள்ளது.

அதாவது, 2030ல் இந்தியாவில் மருத்துவச் சுற்றுலாவின் சந்தை 1.57 லட்சம் கோடி ரூபாயை எட்டிவிடும். இப்போது 84 ஆயிரம் கோடி ரூபாயாக உள்ளது.

2022ம் வருடம் எடுத்த கணக்கின்படி, உலகளாவிய மருத்துவச் சுற்றுலா சந்தையின் மதிப்பு ரூ.11.19 லட்சம் கோடியாக இருந்தது. இந்த மதிப்பு 2030க்குள் ரூ. 27.69 லட்சம் கோடியாக உயரும் என்று எதிர்பார்க்கப்படுகிறது.

உலகளாவிய மருத்துவச் சுற்றுலாவின் சந்தை கூட வருடத்துக்கு 10.8 சதவீத அளவுதான் உயர்கிறது. ஒவ்வொரு வருடமும் 78 நாடுகளிலிருந்து சுமார் 20 லட்சம் பேர் மருத்துவச் சுற்றுலாவுக்காக இந்தியாவுக்கு வருகின்றனர்.

அதென்ன மருத்துவச் சுற்றுலா?

மருத்துவச் சுற்றுலா என்பது ஒரு நபர் தனது சொந்த நாட்டில் உள்ள மருத்துவ வசதிகளை விடச் சிறந்த, மலிவான அல்லது விரைவான மருத்துவச் சிகிச்சையைப் பெறுவதற்காக மற்றொரு நாட்டுக்குப் பயணம் செய்வதைக் குறிக்கும்.

அதாவது, மருத்துவச் சிகிச்சையும், சுற்றுலாவும் இணைந்த ஒரு வடிவமே மருத்துவச் சுற்றுலா.

இங்கிலாந்து, அமெரிக்கா போன்ற வளர்ந்த நாடுகளை விட, இந்தியா போன்ற வளரும் நாடுகளில் மருத்துவச் சிகிச்சைகளுக்கான செலவு மிகக் குறைவு.

அடுத்து பல நாடுகளில் சில முக்கிய அறுவை சிகிச்சைகளுக்குப் பல மாதங்கள் வரை காத்திருக்க வேண்டியிருக்கும். அதனால் உயிருக்கே ஆபத்து நேர்கிற நிலை ஏற்படலாம்.

ஆனால், மருத்துவச் சுற்றுலா மூலம் உடனடியாக சிகிச்சை பெற முடியும். இன்று குறிப்பிட்ட சில நாடுகளில் மட்டுமே உலகத்தரம் வாய்ந்த மருத்துவமனைகளும், சர்வதேச அளவில் அங்கீகரிக்கப்பட்ட மருத்துவர்களும் இருக்கின்றனர்.

அதனால் அந்த நாடுகளை நோக்கிச் செல்லவேண்டிய நிலையும் ஏற்படுகிறது. புதிய மருத்துவ முறைகள் அல்லது அரிதான மருந்துகளுக்காகவே சில நாடுகளுக்கு மக்கள் பயணம் செய்கிறார்கள்.