தாம்பரம் அல்ல... வளையல் புரம்...!

குழந்தைகள் முதல் வயதானவர்கள் வரை அனைத்துப் பெண்களும் விரும்பி அணியும் அணிகலன்களில் ஒன்று வளையல்.

- ப்ரியா

வீட்டில் பெண் குழந்தை பிறந்துவிட்டால் முதலில் அவர்களின் பிஞ்சுக் கரங்களில் அழகான வளையல் அணிந்து அழகு பார்க்க ஒவ்வொரு பெற்றோரும் விருப்பப்படுவார்கள்.

ஆம். வளையல்களை விரும்பாத வளைக்கரங்களே கிடையாது என்றுதான் சொல்ல வேண்டும்.

தங்கம், வெள்ளி மட்டுமில்லாமல் கண்ணாடி, மெட்டல், ஐம்பொன், டிசைனர்... என வளையல்களில் பல ரகங்கள் உள்ளன. அதில் எந்தவித சுப நிகழ்வுகளுக்கும் அனைத்துப் பெண்களும் தேர்வு செய்வது கண்ணாடி வளையல்களைத்தான்.

திருமணம் முதல் வளைகாப்பு மட்டுமில்லாமல், வீட்டில் கொண்டாடப்படும் வரலட்சுமி பூஜை, விளக்கு பூஜை போன்ற சுபநிகழ்வுகளுக்கும் பெண்களுக்கு கண்ணாடி வளையல்களைக் கொடுப்பது இன்று வரை வழக்கமாக உள்ளது. மேலும் ஒவ்வொரு ஆடி மாதமும் அம்மனை முழுக்க முழுக்க கண்ணாடி வளையல் கொண்டு அலங்கரிப்பது வழக்கம்.

தங்க வளையல்கள் இருந்தாலும் அதற்கிடையே உடைக்கு ஏற்ப கண்ணாடி வளையல்களை அணியத்தான் பெண்கள் விரும்புகிறார்கள்.

அப்படி அனைவரும் விரும்பும் கண்ணாடி வளையல்களை இன்றைய மாடர்ன் பெண்கள் விரும்பும் வகையில் பல டிசைன்களில் விற்பனை செய்து வருகிறார் சென்னை தாம்பரத்தைச் சேர்ந்த ராஜராஜேஸ்வரி. இவரின் 'ஸ்ரீசம்பிரதாய ஸ்டோர்' கடையில் ஒரு தளம் முழுக்க முழுக்க பல வண்ணங்கள் மற்றும் டிசைன்களில் கண்ணாடி வளையல்கள் அடுக்கி வைக்கப்பட்டுள்ளன. 'வளையோசை அம்மாச்சி' என்று செல்லமாக அழைக்கப்படும் ராஜராஜேஸ்வரி தன் பயணம் குறித்து உற் சாகத்துடன் பேசத் தொடங்கினார்.

“இந்த வளையல்கள்தான் என் குலதெய்வம். இந்தத் தொழிலை நான் மட்டுமில்லை, என் கணவர், இரண்டு மகள்கள் மற்றும் மகன்கள் என குடும்பமாகச் செய்து வருகிறோம். எங்க ஆறு பேரின் கடின உழைப்புதான் எங்களின் வெற்றியின் ரகசியம்.

நான் பிறந்தது வளர்ந்தது எல்லாம் சென்னை தாம்பரத்தில்தான். அப்பா பெயின்ட் அடிக்கும் தொழில் செய்து வந்தார். எங்க அம்மா இல்லத்தரசி. என்னையும் சேர்த்து என் கூடப் பிறந்தவங்க ஆறு பேர்.

என் அப்பா பிழைப்புக்காக ஊரு விட்டு ஊரு வந்தவர். அப்படி வந்த போது என் அம்மாவின் அம்மாதான் அவருக்கு அடைக்கலம் கொடுத்தாங்க. பாட்டி வீட்டில் தங்கித்தான் அப்பா வேலை பார்த்து இருக்கார். அதனால் என் பாட்டி என் அம்மாவை அவருக்கு கல்யாணம் செய்து வச்சாங்க.