കൃത്രിമബുദ്ധി അത്ര കൃത്രിമമല്ല

ആർട്ടിഫിഷ്യൽ ഇന്റലിജൻസ് എന്നു നമ്മൾ പറയാത്ത ദിവസങ്ങളില്ല. പക്ഷേ, എന്താണ് ഈ പഠനശാഖയുടെ പ്രയോഗസാധ്യതകൾ, അതു പഠിക്കാൻ വേണ്ട ശേഷികൾ, എവിടെയൊക്കെ പഠിക്കാൻ സാധിക്കും എന്നെല്ലാം കരിയർ ഗുരു വിശദീകരിക്കുന്നു.

- ബി.എസ്.വാരിയർ

ആധുനികയുഗത്തിൽ സാങ്കേതികരംഗത്തുണ്ടായ വമ്പൻ കുതിച്ചുചാട്ടമാണ് എഐ (ആർട്ടിഫിഷ്യൽ ഇന്റലിജൻസ്). ഈ മേഖല പഠിക്കാൻ ആഗ്രഹിക്കുന്നവർ ശ്രദ്ധിക്കേണ്ട കുറേ കാര്യങ്ങളുണ്ട്.

കംപ്യൂട്ടറിനും ബുദ്ധി

നാം പഠിപ്പിച്ച കാര്യങ്ങൾ തെറ്റില്ലാതെ തളരാതെ ആവർത്തിച്ചു ചെയ്യാൻ കംപ്യൂട്ടറിനു സാധിക്കും. പക്ഷേ, സ്വയം ചിന്തിക്കാനോ സാഹചര്യത്തിനനു സരിച്ചു അറിവുകൾ പ്രയോഗിക്കാനോ സാധാരണ കംപ്യൂട്ടറിനു കഴിയില്ല. ചില കാര്യങ്ങളിലെങ്കിലും മനുഷ്യരെപ്പോലെ ബുദ്ധി പ്രയോഗിക്കാൻ കംപ്യൂട്ടറുകളെ ശീലിപ്പിക്കുന്ന രീതിയാണ് "കൃത്രിമബുദ്ധി' അഥവാ ആർട്ടിഫിഷ്യൽ ഇന്റലിജൻസ്. സ്വയം ഡ്രൈവ് ചെയ്യുന്ന കാറും മനുഷ്യരുമായി ആശയവിനിമയം നടത്താൻ കഴിവുള്ള ChatGPT, Gemini, Grok, Copilot തുടങ്ങിയ ചാറ്റ്ബോട്ടുകളുമടക്കം വിസ്മയകരമായ പലതും വന്നു കഴിഞ്ഞെങ്കിലും, മനുഷ്യമസ്തിഷ്കത്തിന്റെ കഴിവുകളെല്ലാമുള്ള കംപ്യൂട്ടറുകൾ ഇതുവരെ ഉണ്ടായിട്ടില്ല.

നോക്കിക്കാണുക, യുക്തി പ്രയോഗിക്കുക, പലരുടെയും ശബ്ദങ്ങളോ കൈയെഴുത്തുകളോ തിരിച്ചറിയുക, സാഹചര്യങ്ങൾ വിലയിരുത്തി തീരുമാനങ്ങൾ എടുക്കുക, പഴയ അനുഭവങ്ങളിൽ നിന്നു പാഠങ്ങൾ ഉൾക്കൊള്ളുക, രോഗനിർണയം നടത്തുക, വിവർത്തനം ചെയ്യുക തുടങ്ങിയവ കംപ്യൂട്ടറുകളെ ശീലിപ്പിക്കാം. ഇവയൊക്കെ ചെയ്യുന്ന കംപ്യൂട്ടർ നിയന്ത്രിത റോബട്ടുകളുണ്ട്.

എഐ വൈവിധ്യങ്ങൾ

എഐ രണ്ടു തരത്തിലുണ്ട്. ഏതെങ്കിലുമൊരു വിശേഷ ഉപയോഗത്തിനു മാത്രമുള്ള പരിമിത എഐ (narrow AI), മനുഷ്യമസ്തികത്തെപ്പോലെ പ്രവർത്തിക്കുന്ന ജനറൽ എഐ എന്നിങ്ങനെ.

എഐയുടെ ചില പ്രവർത്തനമേഖലകൾ

മെഷീൻ ലേണിങ്: നിശ്ചിത പ്രോഗ്രാമുകളൊന്നു മില്ലാതെ വിവരശേഖരണം നടത്തുന്ന രീതി.

നാച്വറൽ ലാംഗ്വേജ് പ്രോസസിങ് (NLP): മനുഷ്യരുടെ ഭാഷ ഗ്രഹിക്കുക, വ്യാഖ്യാനിക്കുക, ഭാഷയിൽ വിവരങ്ങൾ തയാറാക്കുക തുടങ്ങിയവ നിർവഹിക്കുന്നു.