ആയുർവേദത്തിന്റെ സ്നേഹസ്പർശത്തിൽ നവജാത ശിശു പരിചരണം

മുലയൂട്ടലാണ് നവജാതശിശു പരിചരണത്തിൽ ഏറ്റവും പ്രധാനം . ഭൂമിയിൽ പിറന്നുവീഴുന്ന ഏതൊരു കുഞ്ഞിൻറെയും ജന്മാവകാശമാണ് മുലപ്പാൽ. പ്രസവാനന്തരം ആദ്യത്തെ രണ്ടുമൂന്നുദിവസം സ്തനങ്ങളിൽ നിന്നും വരുന്ന ഇളം മഞ്ഞ നിറമുള്ള പാൽ (കൊളസ്ട്രം) നിർബന്ധമായും കുഞ്ഞുങ്ങൾക്ക് നൽകണം.

- ഡോ. ഷിബില കെ BAMS. MS(Ayu)

നവജാതശിശു പരിചരണത്തെക്കുറിച്ച് അമ്മമാർക്ക് സംശയങ്ങളും ആശങ്കകളും ഏറെയാണ്, പ്രത്യേകിച്ച് അവരുടെ ആദ്യത്തെ കണ്മണി ആണെങ്കിൽ ജനിച്ച് ആദ്യത്തെ 28 ദിവസം വരെ പ്രായമുള്ള കുഞ്ഞുങ്ങളെയാണ് നവജാത ശിശുക്കൾ എന്നു പറയുന്നത്. ഇവരുടെ പരിചരണം നമ്മൾ ഏറ്റവും ശ്രദ്ധയോടെയും കരുതലോടെയും ചെയ്യേണ്ട ഒന്നാണ്.

മുലയൂട്ടലാണ് നവജാതശിശു പരിചരണത്തിൽ ഏറ്റവും പ്രധാനം . ഭൂമിയിൽ പിറന്നുവീഴുന്ന ഏതൊരു കുഞ്ഞിൻറെയും ജന്മാവകാശമാണ് മുലപ്പാൽ. പ്രസവാനന്തരം ആദ്യത്തെ രണ്ടുമൂന്നുദിവസം സ്തനങ്ങളിൽ നിന്നും വരുന്ന ഇളം മഞ്ഞ നിറമുള്ള പാൽ (കൊളസ്ട്രം) നിർബന്ധമായും കുഞ്ഞുങ്ങൾക്ക് നൽകണം. കൊളസ്ട്രം നൽകുന്നതു വഴി കുഞ്ഞിന്റെ രോഗപ്രതിരോധശേഷി വർദ്ധിക്കുന്നു. ദഹനേന്ദ്രിയ വ്യവസ്ഥ കാര്യക്ഷമമാകുന്നു. മഞ്ഞപ്പിത്തം, ആസ്ത്മ, കരപ്പൻ തുടങ്ങിയ രോഗങ്ങൾക്കെതിരെയും സംരക്ഷണം ലഭിക്കുന്നു. മുലപ്പാലിൽ കുഞ്ഞിന്റെ ശരീരവളർച്ചയ്ക്കും ബുദ്ധിവികാസത്തിനും ആവശ്യമായ എല്ലാ ഘടകങ്ങളും നിർദ്ദിഷ്ടമായ അനുപാതത്തിൽ അടങ്ങിയിട്ടുണ്ട്. അതിനാൽ കുഞ്ഞിന്റെ ആദ്യത്തെ ആറുമാസം മുലപ്പാൽ മാത്രം നൽകിയാൽ മതിയെന്ന് ലോക ആരോഗ്യ സംഘടന നിർദ്ദേശിക്കുന്നു.

സാധാരണ ഗതിയിൽ പ്രസവം കഴിഞ്ഞ് അരമണിക്കൂറിനകം മുലയൂട്ടാവുന്നതാണ്. എന്നാൽ സിസേറിയൻ ആണെങ്കിൽ അമ്മയ്ക്ക് നൽകിയിരിക്കുന്ന അനസ്തേഷ്യ മുതലായവയിൽ നിന്നും മുക്തി നേടിയ ശേഷം മുലയൂട്ടൽ ആരംഭിക്കാം. കുഞ്ഞിനെ ഒരു ദിവസം എത്ര തവണ മുലയൂട്ടണം എന്ന് കൃത്യമായ കണക്കൊന്നുമില്ല. പൊതുവേ രണ്ടുമണിക്കൂർ ഇടവിട്ട് മുലപ്പാൽ നൽകാം. അതോടൊപ്പംതന്നെ കുഞ്ഞിന് ആവശ്യമെന്ന് തോന്നുമ്പോഴെല്ലാം പാൽ നൽകാവുന്നതാണ്. ഇരുസ്തനങ്ങളിൽ നിന്നും മാറിമാറി പാൽ കൊടുക്കണം. ഒരുതവണ 20 മിനിറ്റ് വരെ മുലയൂട്ടാം. മുലപ്പാൽ കുടിക്കുന്ന സമയത്ത് കുഞ്ഞിന് ഏതെങ്കിലും തരത്തിലുള്ള അസ്വസ്ഥത കൾ അനുഭവപ്പെടുകയാണെങ്കിൽ പാൽ നൽകുന്നത് നിർത്തി കുഞ്ഞിനെ ചരിച്ച് കിടത്തി അധികമുള്ള പാൽ ഒഴിക്കളയണം. ശേഷം ചുമലിൽ ഇട്ട് തട്ടണം.