എൻജിൻ ഡീ കാർബണൈസിങ്

എൻജിൻ ഡീ കാർബണൈസിങ് ചെയ്താൽ വാഹനത്തിന്റെ പവർ കൂടുമോ? ഇന്ധനക്ഷമത കൂടുമോ? അതോ എട്ടിന്റെ പണി കിട്ടുമോ? നോക്കാം...

- കെ. ശങ്കരൻകുട്ടി

പഴയ വാഹനങ്ങൾക്ക് കരി അടിഞ്ഞു കൂടുന്നതിനാൽ കരുത്തു കുറയും ഇന്ധനക്ഷമത പാടേ കുറയും വൈബ്രെഷൻ കൂടും അതുകൊണ്ട് എൻജിൻ ഡീ കാർബണൈസിങ് ചെയ്യുന്നതു നന്നായിരിക്കും എന്നു പറയുന്നതു കേട്ടിട്ടില്ലേ... ഡീ കാർബണൈസിങ് സെന്ററുകൾ മുൻപത്തേക്കാളും കൂടുകയും ചെയ്തിട്ടുണ്ട്.

സത്യത്തിൽ ഡീ കാർബണൈസിങ് ചെയ്യുന്നതു കൊണ്ടു ഗുണമുണ്ടോ? ഏതൊക്കെ വാഹനത്തിന് ഇതു പറ്റും തുടങ്ങിയ കാര്യങ്ങൾ ഒന്നു പരിശോധിക്കാം.

പഴയ സാങ്കേതികവിദ്യ ഉപയോഗിക്കുന്ന പെട്രോൾ, ഡീസൽ എൻജിനുക ളിലും 2 സ്ട്രോക് എൻജിനുകളിലും കരി (കാർബൺ) അടിഞ്ഞുകൂടുന്ന പ്രശ്നം വ്യാപകമായിരുന്നു. എൻജിനിൽ ഇന്ധനമെത്തിക്കാൻ കാർബുറേറ്റർ ഉപയോഗിക്കുന്ന തുതൊട്ട് ഘടകങ്ങൾ നിർമിക്കാനുപയോഗി ക്കുന്ന ലോഹങ്ങളുടെ പ്രത്യേകതകൾ വരെ ഈ പ്രക്രിയയ്ക്ക് അനുകൂലമായിരുന്നു. എന്നാൽ മികച്ച സാങ്കേതികവിദ്യ (ഇന്ധന ഇൻജക്ഷൻ, മികച്ച ലൂബ്രിക്കേഷനും താപനിയന്ത്രണവും ഇലക്ട്രോണിക് നിയന്ത്രണത്തിലുള്ള എൻജിൻ പ്രവർത്തനം) ഉപയോഗിക്കുന്നതും കടുത്ത മലിനീകരണ നിയന്ത്രണ പരിധികൾ പാലിക്കുന്നതുമായ ആധുനിക എൻജിനുകളിൽ കരി പിടിക്കുന്നതു കൊണ്ടുള്ള ഉപദ്രവം കുറവാണ്.