മഞ്ഞ സെന്നും ചേർത്തലയിലെ ബെൻസും

വാഹനവിശേഷങ്ങളുമായി സംവിധായകൻ അഖിൽ സത്യൻ

- വി എൻ രാഖി

“മഞ്ഞ സെൻ കാർ എന്ന്  പാച്ചുവിന്റെ സ്ക്രിപ്റ്റിൽ തന്നെ ഞാൻ എഴുതിയിരുന്നു. ഇപ്പോൾ നിരത്തിൽ കാണാത്തൊരു കാർ വേണം എന്നുണ്ടായിരുന്നു. പണ്ട് പ്രീമിയം മിഡിൽ ക്ലാസിലുള്ള, അത്യാവശ്യം ശമ്പളമുള്ള ആളുകൾ വാങ്ങിച്ചിരുന്ന കാറായിരുന്നു സെൻ വണ്ടി മാറ്റാതിരിക്കുന്നത് നല്ല ക്വാളിറ്റിയാണ്. അവർ കുറച്ചുകൂടി അറ്റാച്മെന്റ് ഉള്ളവരായിരിക്കും. ആ കാലവും അങ്ങനെയൊരു ഫാമിലിയിലെ അംഗവുമാണ് പാച്ചു എന്ന കാണിക്കാനാണ് തിരഞ്ഞെടുത്തത്. പടത്തിന്റെ നിർമാതാവ് സേതുവേട്ടൻ സ്വന്തം നാടായ മണ്ണാർക്കാടു നിന്ന് സംഘടിപ്പിച്ചതാണ് ആ സെൻ.'' പാച്ചുവും അദ്ഭുതവിളക്കും സിനിമയിലെ സെൻ വാഹനകഥ പറഞ്ഞ് സംവിധായകൻ അഖിൽ സത്യൻ വാഹനവിശേഷങ്ങൾക്കു തുടക്കമിട്ടു. 

നിവിൻ പോളിയെയാണ് പാച്ചു വായി ആദ്യം കാസ്റ്റ് ചെയ്തത്. നിവിനെ ചിരിപ്പിക്കാൻ വേണ്ടി സ്പോട്ടിൽ ഉണ്ടാക്കിയതാണ് ആ ഹോണടി. പിന്നെയത് വർക്ക് ആയപ്പോൾ സ്ക്രിപ്റ്റിൽ ചേർത്തു. ഉമ്മച്ചിക്കു വേണ്ടി ചേർത്തലയിൽ നിന്ന് 35-40 വർഷം പഴക്കമുള്ള ബെൻസും കൊണ്ടുവന്നു. ഞാൻ ഡയറക്ടർ ആണല്ലോ. വലിയ കാര്യത്തിൽ ചെന്ന് "ഓടിച്ചുനോക്കട്ടെ' എന്നു പറഞ്ഞു. “വേറെയാർക്കും ഓടിക്കാൻ കൊടുക്കില്ലെന്ന് അവർ. ഞാനാകെ ചമ്മിപ്പോയി. ഒരു വിധ ത്തിലാണ് ഇമേജ് രക്ഷിച്ചത്. ഹ്യൂമറിന്റെ മേമ്പൊടിയോടെ അഖിൽ കഥകൾ ഓരോന്നായി പുറത്തെടുത്തു തുടങ്ങി.

വെള്ള മാരുതിയിൽ തേക്കടിയിലേക്ക്

കുട്ടിക്കാലത്ത് യാത്രകൾ വളരെ കുറവായിരുന്നു. അച്ഛൻ വർഷത്തിൽ ഒന്നോ രണ്ടോ സിനിമകൾ ചെയ്യുന്ന സമയം. അക്കാലത്ത് സിനിമയുടെ പോസ്റ്റ് പ്രൊഡക്ഷൻ വർക്സ് എല്ലാം ചെന്നൈയിലായിരുന്നു. ഷൂട്ടിങ് ഇല്ലെങ്കിലും ശ്രീനിയങ്കിളും ലോഹിയങ്കിളുമൊക്കെയായി ഡിസ്കഷന്റെ തിരക്കിലാകും അച്ഛൻ. അക്കാലത്തെ ഓർമയിലുള്ള ഏക വാഹനം സ്കൂളിലേക്കു പോകുന്ന വാൻ ആണ്. അതിലെ യാത്രയേ ഉള്ളു അന്ന്.