റോഡിൽ നമ്മൾ പരാജിതരാകണം

ഫാസ്റ്റ്ട്രാക്ക് അവതരിപ്പിച്ച സേഡ്രൈവ് ബുക്കിന്റെ തുടർഗതാഗത വിദ്യാഭ്യാസം എന്ന ആശയം മുൻനിർത്തി ട്രാൻസ്പോർട്ട് കമ്മിഷണർ എസ്. ശ്രീജിത്ത് എഴുതുന്നു.

- Sreejith

എല്ലാവർക്കും വിജയിക്കാനാണ് ഇഷ്ടം. വിജയിച്ചവരുടെ കഥകളാണു നമ്മൾ കേൾക്കുക. എന്നാൽ ഡ്രൈവിങ്ങിൽ, റോഡിൽ പരാജയമാണു ശരിയായ വിജയം. അതെങ്ങനെയെന്നല്ലേ?

ആദ്യം അറിയേണ്ടത് നമ്മുടെ വാഹനം എന്തിന് എന്നുള്ളതാണ്

സുരക്ഷിതമായി യാത്ര ചെയ്യാൻ എന്നു മാത്രമാണുത്തരം. നമ്മുടെ പൊങ്ങച്ചം, ഈഗോ എന്നിവ പ്രദർശിപ്പിക്കാനുള്ളതല്ല വാഹനം. ഞാനൊരു ഭയങ്കര ഡ്രൈവറാണ് എന്ന തോന്നലുമായാണു നമ്മളിൽ പലരും വാഹനവുമായി റോഡിലിറങ്ങുന്നത്. അപ്പോൾ റോഡ് ഉപയോഗിക്കുന്ന മറ്റുള്ളവരോട് നമ്മൾക്കു ബഹുമാനക്കുറവുണ്ടാകു ന്നു. തന്റെ ഡ്രൈവിങ് കഴിവ് പ്രകടിപ്പിക്കാൻ അമിതവേഗമെടുക്കൽ, മറ്റു വാഹനങ്ങളെ അപകടകരമായ രീതിയിൽ ഓവർടേക്ക് ചെയ്യൽ എന്നിങ്ങനെയുള്ള സ്വഭാവ രീതികൾ പുറത്തെടുക്കുന്നു. മറ്റൊരു കാറിനെ ഓവർടേക്ക് ചെയ്യുമ്പോഴോ, ചുവപ്പു സിഗ്നൽ മറികടന്നു പോകുമ്പോഴോ, റോഡ് നിയമങ്ങൾ തെറ്റിക്കുമ്പോഴോ, താൻ വിജയം നേടിയെന്ന തോന്നൽ ഇങ്ങനെ റോഡ് റേജ് നടത്തുന്നവർക്കു ണ്ടാകും.