ടേം ഇൻഷുറൻസ് എന്തിന് ?

സമ്പത്തു കാലത്തു നടുന്ന തൈകളാണു നിക്ഷേപങ്ങൾ. വരുമാനം എങ്ങനെ സുരക്ഷിതമായ നിക്ഷേപമാക്കാം എന്നു ചിന്തിക്കുന്നവർക്ക് മാർഗനിർദേശങ്ങൾ നൽകുന്ന പംക്തി...

- നിഖിൽ ഗോപാലകൃഷ്ണൻ സിഇഒ, പെന്റാഡ് സെക്യൂരിറ്റീസ്

നമ്മുടെയൊക്കെ ഫോണിനും കാറിനും ബൈക്കിനും വീടിനും ഇൻഷുറൻസ് പരിരക്ഷ ഉറപ്പാക്കിയിട്ടുണ്ടാകും. വില നൽകി വാങ്ങുന്നതൊക്കെ സുരക്ഷിതമാക്കുമ്പോൾ വിലമതിക്കാനാകാത്ത സ്വന്തം ജീവനും കുടുംബത്തിന്റെ ഭാവിയും സുരക്ഷിതമാണെന്ന് ഉറപ്പാക്കേണ്ടത് അത്യാവശ്യമല്ലേ?

ടേം ഇൻഷുറൻസിനെ മരണവുമായി കൂട്ടിക്കെട്ടേണ്ടതില്ല. നമുക്കുശേഷവും മുന്നോട്ടു പോകുന്ന, പോകേണ്ട ജീവിതവുമായി ബന്ധപ്പെട്ടിരിക്കുന്ന വസ്തുതയാണ് ഇൻഷുറൻസ് പരിരക്ഷ.

എന്താണ് ടേം ഇൻഷുറൻസ്?

ഒരു വ്യക്തിയുടെ സാമ്പത്തിക യാത്രയിൽ ലൈഫ് ഇൻഷുറൻസുകൾ വളരെ പ്രധാനമാണ്. ലൈഫ് ഇൻഷുറൻസുകളിൽ ടേം ഇൻഷുറൻസ് വളരെയേറെ പ്രാധാന്യമർഹിക്കുന്നു. ഇത് ഒരിക്കലുമൊരു നിക്ഷേപമല്ല, മറിച്ച് സുരക്ഷിതത്വമാണ് എന്നു മനസ്സിലാക്കണം.

ഇൻഷുറൻസ് എടുക്കുന്ന വ്യക്തി മരണപ്പെട്ടാൽ അയാളുടെ നോമിനിക്ക് ഇൻഷ്വറൻസ് തുക ലഭിക്കുമെന്നതാണ് പ്രത്യേകത. ഒരു വ്യക്തിയുടെ സാമ്പത്തിക ചുമതലകളും ഉത്തരവാദിത്തങ്ങളും കണക്കിലെടുത്തു വേണം ഇൻഷുറൻസ് തുക കണക്കിലാക്കാൻ.