ന്യൂജെൻ നൻപൻ

ഫ്രണ്ട്ഷിപ്പിനു പുതിയ മുഖം നൽകിയ അമൽ ഡേവിസിലൂടെ തിളങ്ങിയ സംഗീത് പ്രതാപ് ഇനി നായകനാകുന്നു

- രൂപാ ദയാബ്ജി

ഏതു പ്രശ്നത്തിൽ ചെന്നു ചാടിയാലും നൈസായി ഊരിയെടുക്കുന്ന ഒരു ചങ്ക് സുഹൃത്തു മിക്കവർക്കും കാണും. അങ്ങനെ ഇല്ലാത്തവർ പോലും പ്രേമലുവിനു ശേഷം ജീവിതത്തിലെ അമൽ ഡേവിസിനെ തപ്പിയിട്ടുണ്ടാകും. അമൽ ഡേവിസിനെയും അമ്പാനെയും പോലെ സ്ട്രോങ്ങായി കൂടെ നിൽക്കുന്ന ഒരാളെങ്കിലും വേണമെന്നു പറയാത്ത ന്യൂജെൻ കാണില്ല.

ഹൃദയപൂർവം തിയറ്ററുകൾ നിറഞ്ഞോടുമ്പോഴാണു ജെറിയായി ലാലേട്ടനൊപ്പം തിളങ്ങിയ സംഗീത് പ്രതാപിനെ കണ്ടത്. സൗഹൃദങ്ങളുടെ കെമിസ്ട്രി സിനിമയിൽ വർക്കാകുന്നതിന്റെ രഹസ്യം തന്നെയാണ് ആദ്യം ചോദിച്ചത്. ജീവിതത്തിലും ഞാനൊരു അമൽ ഡേവിസാണ് എന്നായിരുന്നു സംഗീതിന്റെ മറുപടി. “പ്രേമലു പോലെ അഡ്വഞ്ചറായിട്ടുള്ള കാര്യങ്ങളൊന്നും പറയാനില്ലെങ്കിലും കൂട്ടുകാരുടെ ചെറിയ സന്തോഷങ്ങളിൽ വരെ ഭാഗമാകാൻ റെഡി. എന്റെ ജീവിതത്തിലും കുറച്ചധികം അമൽ ഡേവിസ്മാരുണ്ട്.'' ന്യൂ ജനറേഷൻ നൻപൻ റോ ളുകൾക്കു ശേഷം നായകനാകാനൊരുങ്ങുകയാണു സംഗീത് പ്രതാപ്.

സിനിമ സ്വപ്നം കണ്ടത് എന്നു മുതലാണ് ?

കൊച്ചി, വൈപ്പിനിലാണു ജനിച്ചതും വളർന്നതും. അച്ഛൻ പ്രതാപ് സിനിമട്ടോഗ്രാഫർ ജയനൻ വിൻസന്റിന്റെ അസിസ്റ്റന്റായിരുന്നു. തൂവാനത്തുമ്പികൾ, രാജാവിന്റെ മകൻ, ഇൻ ഹരിഹർ നഗർ പോലുള്ള സിനിമകളുടെ ഭാഗമായിരുന്നു അച്ഛൻ ഗവൺമെന്റ് സ്കൂൾ ടീച്ചറായിരുന്ന അമ്മ ആനിയോടും സ്കൂൾ കുട്ടിയായിരുന്ന എന്നോടുമൊക്കെ ഷോട്ടുകളെ കുറിച്ചും ക്യാമറ ലെൻസിങ്ങിനെ കുറിച്ചുമൊക്കെ അച്ഛൻ സംസാരിക്കും.

സിനിമയിലേക്കില്ല എന്നു തീരുമാനിച്ചാണു ഞാൻ പഠനത്തിൽ ശ്രദ്ധിച്ചത്. അതു കൊണ്ടുതന്നെ സിനിമകൾ കാണുന്നതും കുറവായിരുന്നു. പക്ഷേ, സിനിമ മാജിക് പോലെ ചേർത്തുനിർത്തി. അച്ഛന്റെ ഷോർട് ഫിലിമിൽ അസിസ്റ്റന്റായാണു തുടക്കം, അന്നു പത്താം ക്ലാസ്സിൽ പഠിക്കുകയാണ്. പിന്നെ സിനിമാ സംവിധായകനാകണം എന്ന മോഹം മനസ്സിൽ കയറിക്കൂടി.

അഭിനയമോഹം അന്നൊന്നും ഇല്ലേ ?

സ്കൂൾ കലോൽസവത്തിൽ മിമിക്രിയും മോണോആക്ടും നാടോടിനൃത്തവും ഡാൻസുമായിരുന്നു ഐറ്റംസ്. പ്ലസ് വണ്ണിൽ വച്ചു ജില്ലാ തലത്തിൽ മിമിക്രിക്ക് ഒന്നാംസമ്മാനം കിട്ടി. അന്നു പത്രത്തിൽ ഫോട്ടോ വന്നതു വീട്ടിൽ വലിയ ആഘോഷമായിരുന്നു. പക്ഷേ, അപ്പോഴും അഭിനയിക്കാനുള്ള മോഹം ഇല്ല.