ജൂനിയർ ഇന്നസെന്റ് അഥവാ ഇന്നു

അപ്പാപ്പന്റെ വഴിയേ സിനിമയെ സ്നേഹിക്കാനും ചിരിമരുന്നു കൊണ്ടു ഹൃദയം നിറയ്ക്കാനുമുള്ള ഒരുക്കത്തിലാണ് നടൻ ഇന്നസെന്റിന്റെ കൊച്ചുമകൻ ഇന്നസെന്റ് സോണറ്റ്

- ഡെൽന സത്യരത്ന

പോയാലൊരു വാക്ക്, കിട്ടിയാൽ ചാൻസ്

നാടോടിക്കാറ്റ് സിനിമയിൽ ശ്രീനിവാസൻ പറയുന്ന ഡയലോഗില്ലേ? "എല്ലാത്തിനും അതിന്റേതായ സമയമുണ്ട് ദാസാ. അതുപോലെയാണ് എന്റെ സിനിമാജീവിതത്തിന്റെ തുടക്കവും. ഇപ്പോഴാകും എന്റെ സമയം തുടങ്ങുന്നത്.

ഒരു വർഷം മുൻപാണ് ടിനി ടോം അങ്കിൾ അപ്പനെ വിളി ച്ച് "ഇന്നുവിനെ നമുക്കു സിനിമയിലഭിനയിപ്പിച്ചാലോ എന്നു ചോദിക്കുന്നത്. കേട്ടപാതി കേൾക്കാത്ത പാതി ഞാൻ കമ്മിറ്റ് ചെയ്തു. അപ്പാപ്പനിലൂടെ കണ്ടും കേട്ടുമറിഞ്ഞ സിനിമാലോകത്തോട് എനിക്ക് ഇഷ്ടമുണ്ട്.

കുറച്ചു വർഷങ്ങൾക്കു മുൻപ് സത്യനങ്കിളും വിളിച്ചിരുന്നു. എന്നെയല്ല, സഹോദരി അന്നയെ. എന്നും എപ്പോഴും എന്ന സിനിമയിൽ മഞ്ജു വാര്യറുടെ മകളുടെ വേഷമായിരുന്നു. അന്ന അന്നു താൽപര്യമില്ലെന്നു പറഞ്ഞു.