ഞൊടിയിടയിൽ സുന്ദരിയാക്കും നാടൻകൂട്ടുകൾ

ഉണക്കിപ്പൊടിച്ചും മിശ്രിതമാക്കിയും വിട്ടിൽ സൂക്ഷിക്കാൻ കഴിയും ഈ സൗന്ദര്യക്കൂട്ടുകൾ

- 

താരങ്ങളിൽ പലരും ഇൻസ്റ്റഗ്രാം പേജിലൂടെ തങ്ങളുടെ സൗന്ദര്യരഹസ്യം പരസ്യമാക്കാറുണ്ട്. നാടൻ കൂട്ടുകൾ ഉപയോഗിച്ചുള്ള ഹോം മെയ്ഡ് ഫേഷ്യലിനോടാണു താരസുന്ദരിമാർക്ക് പ്രിയം. ചർമത്തിനു കിട്ടുന്ന തിളക്കവും ഭംഗിയും കൂടുതൽ നാൾ നിലനിൽക്കുമെന്നതാണ് നാടൻ കൂട്ടുകളോടുള്ള ഇഷ്ടത്തിന് കാരണം. പാർശ്വഫലങ്ങളെ പേടിക്കുകയും വേണ്ട.

വീട്ടുകാര്യങ്ങളും ജോലിയുടെ തിരക്കും കാരണം നാടൻ കൂട്ടുകൾ തയാറാക്കാൻ സമയം കിട്ടണമെന്നില്ല. അവധി ദിവസങ്ങളിൽ അൽപനേരം ചെലവഴിച്ചാൽ അഴക് പകരും കൂട്ടുകൾ ഒരുക്കി ഫ്രിജിൽ സൂക്ഷിക്കാം. ആവശ്യാനുസരണം ഉപയോഗിക്കാം. എത്ര തിരക്കുള്ള സമയത്തും ഒപ്പമുണ്ടാകും അഴക് തിളങ്ങുന്ന ചർമവും മുടിയും

 അഞ്ചു മിനിറ്റിൽ തിളങ്ങും ചർമം

രാവിലെ തിരക്കിട്ടോടുന്നതിനിടയിൽ വെള്ളരി ഐസ് ക്യൂബ് കൊണ്ട് മുഖം മസാജ് ചെയ്താൽ മതി, അഞ്ചു മിനിറ്റ് കഴിയുമ്പോൾ കാണാം വെള്ളരി മാജിക്. ഇതിനു വേണ്ടി ഒരു വെള്ളരിയുടെ പകുതി മിക്സിയിൽ അടിച്ചെടുത്ത് ഐസ് ട്രേയിലാക്കി ഫ്രീസറിൽ സൂക്ഷിക്കുക. പ്രകൃതിദത്തമായ പച്ചക്കറികളും പഴങ്ങളുമെല്ലാം ഇങ്ങനെ ഐസ് ക്യൂബാക്കാം. ഒരു മാസം വരെ ഫ്രീസറിൽ സൂക്ഷിക്കാം.

ചെറുപ്പം നിലനിർത്തും മാജിക് ഐസ് ക്യൂബ്

ഒരു ചെറിയ സ്പൂൺ വീതം മുൾട്ടാണിമിട്ടി, ചെറുപയർ പൊടി, പാൽപ്പൊടി ഇവ മിശ്രിതമാക്കുക. ഈ കൂട്ടിൽ ഒരു ചെറിയ സ്പൂൺ വീതം ഓറഞ്ചു നീര്, തക്കാളി നീര് ഇവ ചേർക്കുക. ഇത് ഐസ് ട്രേയിലാക്കി ഫ്രീസറിൽ വയ്ക്കുക. ഈ ഐസ് ക്യൂബ് കൊണ്ടു മുഖം മസാജ് ചെയ്തതിനു ശേഷം അഞ്ചു മിനിറ്റ് കഴിഞ്ഞു കഴുകാം.

കറുത്ത പാടുകൾ അകറ്റും ഐസ് ക്യൂബ്

ഒരു തക്കാളി കഴുകി വൃത്തിയാക്കി മുറിച്ച് അൽപം വെള്ളം ചേർത്ത് മിക്സിയിൽ അടിച്ചെടുക്കുക. ഇതിലേക്കു രണ്ടു ചെറിയ സ്പൂൺ തേൻ, ഒരു ചെറിയ സ്പൂൺ വീതം നാരങ്ങാനീര്, റോസ് വാട്ടർ ഇവ ചേർത്തു നന്നായി ഇളക്കി ഐസ് ട്രേയിൽ ഒഴിച്ച ശേഷം ഫ്രീസറിൽ വയ്ക്കുക.

ഈ ഐസ് ക്യൂബ് ഉപയോഗിച്ചു മുഖം മസാജ് ചെയ്യുന്നതു കറുത്ത പാടുകൾ അകറ്റും. തക്കാളി അരച്ച് ജ്യൂസ് മാത്രമായി ട്രേയിലൊഴിച്ചു തയാറാക്കിയ ഐസ് ക്യൂബ് ചർമത്തിനു തിളക്കമേകും.

ആന്റി ഏജിങ് ക്രീം