இந்தோனேஷியாவில் காண வேண்டிய புராதன சின்னங்கள்!

சென்ற இதழின் தொடர்ச்சியாக இந்தோனேஷியாவில் காண வேண்டிய மேலும் சில இடங்களைப் பற்றி இந்த இதழில் தெரிந்து கொள்வோம்.

- - திவ்ய மீனா

கொரோனாவுக்கு பிறகு உலகில் உள்ள அனைத்து சுற்றுலா இடங்களும் களை கட்டுகிறது. இந்தியாவிலிருந்து இந்தோனேஷியாவுக்கு சுற்றுலா செல்பவர்கள் எண்ணிக்கையும் அதிகரிக்கிறது. கோவில்கள், மத வழிபாட்டு தலங்கள் புராதன சின்னங்கள் தூய்மையாக பராமரிக்கப்படுகின்றன. ராமாயணம், மகாபாரதம் அங்கு போற்றப்படுகின்றன. அதிகளவில் சுற்றுலாப் பயணிகளை ஈர்க்கிறது. குறைந்தது 1 வார காலம் தங்கி சுற்றிப்பார்க்க வேண்டிய அளவில் இந்தோனேஷியா சுற்றுலா அமைகிறது.

மகாவிஷ்ணு கோவில்: சிவன் கோவிலின் வடக்குப் பக்கத்தில் 33 மீட்டர் உயரத்தில் இக்கோவில் உள்ளது. முப்பது படிகள் மீது ஏறிச் சென்றால், மேலே நான்கு கரங்களைக் கொண்டு நிற்கின்ற விஷ்ணு பகவானைக் கண்டு தரிசிக்கலாம் கோவிலின் உட்சுவர்களில் மகாபாரதத்தின் நாயகன் கிருஷ்ணரின் கதை அருமையாக செதுக்கப்பட்டுள்ளன. தாமரைப் பூவின் மீது விஷ்ணு அழகாக நிற்கிறார்.

விஷ்ணு கோவிலின் எதிரில், அவரது கருட வாகனக் கோவில் உள்ளது. இந்தோனேஷிய தேசிய சின்னம் கருடர் ஆகும். கோவிலினுள் தற்சமயம் கருடர் சிலை இல்லை.

சிவபெருமான் கோவில்: பிரம்மா மற்றும் விஷ்ணு கோவில்களுக்கு நடுவே 47 மீட்டர் உயரமும், 34 மீட்டர் அகலமும் கொண்ட சிவபெருமான் கோவில் கம்பீமாக நிற்கிறது. இரண்டு சிங்கங்கள் மற்றும் வளைந்த பாறைக் கற்களை, இதன் அடிப்பாகம் கொண்டுள்ளது. படிகள் மீது ஏறிச் சென்று பார்க்கையில், தாமரைப் பூவின் மீது நிற்கும் சிவனைக் கண்டு வணங்கலாம்.

சிவன் கோவில் எதிரே, நந்தி தேவரின் கோவில் உள்ளது. நந்தி தேவரின் சிலை நன்கு பளிச்சென இருக்கிறது. மூன்று கடவுள்கள் மற்றும் அவர்களது வாகனங்களின் கோவில்களைக் காண வரும் சுற்றுலாப் பயணிகள் அநேகர். புகைப்பட பிரியர்களுக்கு ஏற்ற இடம்.