திருவக்கரை வக்ரகாளி அம்மன்!

காளி உருவம் காளி என்றாலே நமக்குள் ஒரு பயம் வருகிறது. உக்கிரமானவள். ஆக்ரோஷமானவள் என்று தான் நினைக்கிறோம்.

- ஜி.ஏ.பிரபா

காளியின் மகிமை: அவளுடைய தோற்றமே அச்சமூட்டுவதாக உள்ளது. ஆனால் அவள் தீயவர்களுக்கு மட்டும்தான் பயங்கரமானவள். தன்னை நம்பும் பக்தர்களுக்கு அன்பான தாய் போன்றவள். பிரம்ம சக்தியாக விளங்கும் அவளே அனைத்துக்கும் ஆதாரமாக விளங்குகிறாள்.

பிரம்மசக்தி: பிரம்மம் அசைவில்லாமல் இருக்கிறது. அந்த பிரம்மத்தின் காரியங்களைச் செய்யும் சக்தியே பராசக்தி. தட்சிணாமூர்த்தியாக யோக நிஷ்டையில் ஈசன் அமர்ந்திருக்கும் போது அவர் உள்ளிருக்கும் அம்பிகை வெளிப்பட்டு துஷ்டர்களை அழித்து தர்மத்தை நிலை நாட்டுகிறாள். அம்பிகையே பரமாத்மா. அனைவருக்குள்ளும் இருந்து சக்தியைத் தருபவள். அவளின் அபாரமான சக்தியை வெளிப்படுத்துவது காளி ரூபம்.

அவதாரங்கள் எல்லாம் மனிதர்களை நல்வழிப் படுத்தவே உண்டாகின்றன. தன்னை நம்பி வருபவர்களை காக்கவே அவள் காளி அவதாரமும் எடுக்கிறாள். காளி என்றாலே பயமும், நடுக்கமும் உண்டாகும் நம் மனதில். ஆனால் அவளை உபாசிக்க நாளடைவில் பயம் நீங்கி அவளிடம் ஒரு பக்தியும், ஈடுபாடும் உண்டாகி விடும். துஷ்ட நிக்ரகம் காரணமாகவே அம்பிகை எடுத்த அனைத்தும் நான் எனும் காளியைப் புரிந்து கொண்டால் அவளிடம் பயம் ஏற்படாது. அந்த வகையில் விழுப்புரம் மாவட்டத்தில் அமைந்த திருவக்கரை ஸ்ரீ வக்ரகாளியம்மன் பக்தர்களுக்கு அருள் புரிவதற்காக அங்கு கோவில் கொண்டிருக்கிறாள்.

அம்பிகையின் ரூபம்:

இங்கு அம்பிகை அமிர்தேஸ்வரி, வடிவாம்பிகை என்ற திருப்பெயர்களுடன் காட்சி அளித்தாலும் அவளின் காளி சொரூபமே மிகப் பிரசித்தம். குண்டலினி முனிவர் வம்சத்தில் வந்த வக்கிராசுரன் என்ற அசுரனை அழிக்க ஈசனிடம் வரம் பெற்று, அன்னை காளியாக அவதாரமெடுத்து அவனுடன் போர் புரிந்து வெற்றி பெற்றாள். சிவபெருமானை நோக்கி உக்கிர தவம் இருந்த வக்கிராசுரன் அவரிடமிருந்து ஏராளமான வரங்கள் பெற்றான். அதனால் ஆணவம், தான் என்ற செருக்கு அடைந்த அவன் பல கொடுமைகள் செய்தான். மக்களைத் துன்புறுத்தி வந்தான். தேவர்களை அடிமைப்படுத்தி எண்ண முடியாத அக்கிரமங்கள் செய்தான்.