നിലപാട്

അദ്ദേഹം പ്രതിനിധാനം ചെയ്യുന്ന പ്രത്യയശാസ്ത്രത്തിന്റെ മികവല്ല പരാമർശ വിഷയം. മറിച്ച് അദ്ദേഹത്തിന് അതിനോടുളള അകളങ്കവും ആത്മാർത്ഥവുമായ പ്രതിബദ്ധതയാണ്. സ്വന്തം വിശ്വാസപ്രമാണങ്ങൾക്കൊപ്പം ഏത് വിപരീ തഘട്ടത്തിലും ഉറച്ചു നിന്ന് പ്രവർത്തിക്കാനുള്ള ആ മനസാണ് അദ്ദേഹത്തെ എക്കാലത്തും എല്ലാവർക്കും പ്രിയങ്കരനാക്കുന്നത്.

- സജിൽ ശ്രീധർ

അശോകൻ ചെരുവിൽ കേരളത്തിലെ മുൻനിര  എഴുത്തുകാരിലൊരാളാണ്. മികച്ച ചെറുകഥാകൃത്ത് എന്ന നിലയിൽ ലബ്ധപ്രതിഷ്ഠായ എഴുത്തുകാരനാണ്. കേരളസാഹിത്യ അക്കാദമിയുടെ ഉപാദ്ധ്യക്ഷനാണ്.

പുരോഗമന കലാസാഹിത്യസംഘം സംസ്ഥാന ജനറൽ സെക്രട്ടറിയാണ്. ഇപ്പോൾ കാട്ടൂർകടവ് എന്ന സമാനതകളില്ലാത്ത നോവലിലൂടെ മലയാള സാഹിത്യത്തിൽ വ്യാപകമായി ചർച്ച ചെയ്യപ്പെടുന്ന നോവലിസ്റ്റ് കൂടിയാണ്. ഇതൊക്കെ അദ്ദേഹത്തിന്റെ ബാഹ്യവിശേഷണങ്ങൾ മാത്രം. എന്നാൽ ഇവിടെ ചർച്ച ചെയ്യാനുദ്ദേശിക്കുന്നത് ചരുവിലിന്റെ സാഹിത്യമികവിനെക്കുറിച്ചല്ല. നിരൂപകരും വായനക്കാരും മാധ്യമങ്ങളും അതൊക്കെ എന്നേ മനസിലാക്കിയിട്ടുളളതാണ്. തിരിച്ചറിഞ്ഞു കഴിഞ്ഞതാണ്. എന്നാൽ കേരളത്തിൽ അത്യപൂർവമായ നിലപാട് എന്നൊരു സംഗതിയുണ്ട്. സ്ഥാനത്തും അസ്ഥാനത്തും പലരും ആ വാക്ക് ഉപയോഗിക്കാറുണ്ടെങ്കിലും അതിന്റെ ആന്തരികഭംഗിയെക്കുറിച്ച് പലരും വേണ്ടത്ര ബോധവാന്മാരല്ല എന്നതാണ് സത്യം.