மறதி எத்தனை வகை?

நினைவுத்திறன் மற்றும் மறதி போன்ற விஷயங்களைப் பற்றிப் பல ஆய்வுகளைச் செய்த முன்னோடியாக கருதப்படுபவர் எப்பிங்ஹாஸ். 1885இல் அவர் மறதி வளைவு என்ற கருத்தாக்கத்தை முன்வைத்து, ஒருவரின் 50 சதவீதம் நினைவுகள் ஒரே நாளில் மறந்துவிடும் என்றும், எழுபது சதவீதம் நினைவுகள் ஒரு வாரத்தில் மறந்துவிடும் என்றும் கூறினார். அந்தக் கருத்தாக்கம் தான் இவ்வளவு நாள் உளவியலாளர்கள் மத்தியில் நம்பப்பட்டு வந்திருக்கிறது.

- -டாக்டர் அகிலாண்ட பாரதி- டாக்டர் தேவி பிரபா!

ஒரு நூற்றாண்டுக்கும் மேலாக இதே கோட்பாடு நடைமுறையில் இருந்துவந்த நிலையில் அதை மீள் ஆய்வு செய்தால் என்ன என்று சில உளவியலாளர்கள் நினைக்க, 2015ல் சில மறு ஆய்வுகள் நடந்தன. அவையும் எப்பிங்ஹாஸ் கூறியது சரியே என்றன!

இதையெல்லாம் வைத்து மறதி நல்லது, மற்றும் இயல்பானது என்று ஏற்றுக்கொண்டு விட்டது உளவியலாளர்கள் உலகம். பொதுவாக மறதியை இரண்டு விதமாக வகைப்படுத்தலாம். சாதாரண மறதி, அசாதாரணமான மறதி. சாதாரணமான மறதி என்பது நம் அனைவருக்கும் ஏற்படக்கூடியது தான். 'பேனாவை எங்கேயோ வச்சிட்டேனே', 'கேஸ் புக் பண்ணி இருக்கணும், மறந்துட்டேன்' போன்ற விஷயங்கள் இந்த பட்டியலுக்குள் வருவன. முன்பெல்லாம் சமையல் எரிவாயு சிலிண்டரை பதிவு செய்து வைத்திருந்தால் 20 முதல் 30 நாட்கள் வரை காத்திருக்க வேண்டும். இப்பொழுது ஒரே நாளில் எரிவாயு சிலிண்டர் கிடைத்து விடுகிறது.

அதனால் வழக்கமாக பதிவு செய்யும் தேதியைத் தாண்டி ஓரிரு நாட்கள் மறந்தாலும் ஒன்றும் ஆகிவிடாது, எப்பொழுது புக் செய்தாலும் ஒரே நாளில் கிடைத்துவிடும் என்ற நம்பிக்கை இருப்பதால் நம் மூளை அதற்கு அதிக முக்கியத்துவம் கொடுக்காமல் மறந்துவிடத் தலைப்படுகிறது.

'என்னோட நம்பர் சொல்றேன், எழுதிக்கோங்க' என்று பத்து வருடத்துக்கு முன்பாக யாராவது சொன்னால் உடனடியாகக் குறிப்பேட்டைத் தேடுவோம். சொல்லுங்க என்று ஆர்வமாக எழுதிக் கொள்வோம். இப்போதெல்லாம், 'ஒரு மிஸ்டு கால் குடுங்க, அப்புறமா சேவ் பண்ணிக்கிறேன்' என்றோ, 'என் தங்கச்சி கிட்ட உங்க நம்பர் இருக்குல்ல, வேணும்னா வாங்கிக்கிறேன்' என்றோ சொல்கிறோம். அதற்குக் காரணம் அனைவரின் கைகளிலும் தவழும் ஸ்மார்ட்ஃபோன்.

அதனால் ஒருவர் தன் அலைபேசி எண்ணை சொன்னார் என்றால் அதை நினைவில் வைத்துக் கொள்ள நாம் அதிகம் மெனக்கிடுவதில்லை. கேட்டுக் கொள்ளலாம், தேடிக் கொள்ளலாம் என்று நினைக்கிறோம்.

புதிதாக ஒரு இடத்திற்கு செல்லப் போகிறோம் என்றால், முந்தைய தலைமுறையினர் முகவரியை எழுதி வைத்து, வழியையும் விசாரித்துக் குறித்துக் கையில் வைத்திருப்பார்கள். இப்போது, கூகிள் பண்ணிப் பார்த்துக்கலாம் என்கிறோம். தேவையில்லாமல் அந்த முகவரியை நினைவு வைத்திருப்பதில்லை. இதுவும் சாதாரண மறதி வகையில்தான் வரும்.