கண்ணர் எத்தனை வகை?

* கண்ணீர் நல்லதா கெட்டதா? ஆண்கள் அழக்கூடாது என்கிறார்களே அது சரிதானா? *'உன் கண்ணில் நீர் வழிந்தால் என் நெஞ்சில் உதிரம் கொட்டுதடி என்கிறார்களே.. அது ஏன்? அத்தனை கேள்விகளுக்கும் இப்பொழுது விடைகளைப் பார்ப்போம்.

- -டாக்டர் அகிலாண்ட பாரதி -டாக்டர் தேவி பிரபா

மனித உடலில் உற்பத்தியாகும் கண்ணீரை மூன்று விதமாகப் பிரிக்கலாம்.

*முதலாவது, Basal tears என சொல்லப்படும் கண்ணீர், கண்களில் இருக்கும் இயல்பான ஈரப்பசையைக் குறிக்கிறது. கண்களில் உலர்வுத் தன்மை ஏற்படாமல் வைத்துக் கொள்ளவும், மெல்லிய, கண்ணுக்குத் தெரியாத தூசிகள் விழுந்தால் அவற்றை ஓரமாக ஒதுக்குவதற்கும் இந்தக் கண்ணீர் பயன்படுகிறது. இது 24 மணி நேரமும் ஒருவர் கண்ணில் உற்பத்தியாகி கொண்டே இருக்கக்கூடியது.

அடுத்த வகையை reflex tears என்று சொல்வோம்.

வெங்காயம் உரிக்கும் போதோ, திடீரென்று வாகனத் தில் போகும் பொழுது ஒரு பூச்சி அல்லது பெரிய தூசி ஒன்று விழுந்து விட்டாலோ கண்களில் கொட்டோ கொட்டு என்று கண்ணீர் கொட்டுமே.. அது இந்த வகையைச் சார்ந்தது.உடலுக்கு ஒவ்வாதது என்று உடல் நினைக்கும் பொருட்களை வெளியேற்றுவதற்காக இயற்கை அளித்திருக்கும் வரம் அது.

மூன்றாவது வகைக் கண்ணீர் தான் நாம் விவாதிக்க வேண்டிய விஷயம். மன உணர்வுகளுடன் சம்பந்தப்பட்ட Emotional tears தான் அது. ஆனந்தக் கண்ணீரும், துக்கத்தில் வரும் கண்ணீரும் இந்த வகையைச் சேர்ந்ததுதான்.

கண்ணீரில் தாது உப்புக்கள்,ப்ரொலாக்டின் போன்ற பொருட்கள் காணப்படுகின்றன. கண்ணீர் படலம் கண்களுக்குத் தேவையான அளவு வெப்பநிலையையும் அளிக்கிறது. உணர்வுகள் காரணமாகத் தோன்றும் கண்ணீரில் மற்ற இருவகைக் கண்ணீர்களை விட அடர்த்தி அதிகமாக இருக்கும்.

அதனால் உணர்ச்சிவசப்பட்டு அழும் பொழுது, கண்ணீர் வழிந்த கன்னங்களில் தடம் ஏற்படுவதை நீங்கள் காணலாம்.

உலகம் முழுவதுமே ஒரு வினோதமான நம்பிக்கை இருக்கிறது. ஆண் அழக்கூடாது என்பதுதான் அது. பொதுவாக பத்து வயது வரைக்கும் ஆண், பெண் இருபாலரும் ஒரே மாதிரியாக தான் கண்ணீர் வடிக்கிறார்கள். கீழே விழுந்து விட்டால், யாரேனும் திட்டி விட்டால், மருத்துவர் ஊசி போட வந்தால் ஆண்பெண் இருவருமே ஒரே மாதிரியான எதிர்வினையைத் தான் காட்டுகிறார்கள். பத்து வயதுக்குப் பின் ஆண்கள் அழுவது வெகுவாகக் குறைந்து விடுகிறது.

உலகெங்கிலும் உள்ள ஆய்வுகளை வைத்துப் பார்த்தால் பெண்கள் ஆண்களைவிட நான்கு மடங்கு அதிகமாகக் கண்ணீர் வடிக்கிறார்கள் என்பது தெரிகிறது.