நீர்நிலை மாசு....குறையும் வலசை வரும் பறவைகள்!

ஒவ்வொரு ஆண்டும் பறவைகள், கண்டங்கள் மற்றும் பெருங்கடல்களில் ஆயிரக்கணக்கான கிலோமீட்டர்கள் தூரம் பறந்து வெளிநாடுகளுக்கு புலம் பெயர்வது வழக்கம்.

- எஸ்.ரவீந்திரன்

நாடு, மொழி, இனம் இப்படி எதுவும் இல்லாமல் தனக்கு தகுந்த வாழ்விடம் மற்றும் இனப்பெருக்கம், உணவு மற்றும் தங்குமிடம் ஆகியவற்றிற்கு ஏற்ற காலநிலையைத் தேடி தொடர்ச்சியாக தங்கள் சிறகுகளை விரித்து குறிப்பிட்ட பகுதிகளுக்கு செல்கின்றன.

இப்படி உலகத்தில் உள்ள பல்வேறு பறவை இனங்கள் குறிப்பிட்ட பருவங்களில் இனப்பெருக்கம் செய்வதற்கும் குஞ்சுகளை வளர்ப்பதற்கும் ஏற்றது நம் இந்தியாதான். காரணம் இங்கு மிகவும் சாதகமான நிலப்பரப்புகள் உள்ளன.

இதனால் இந்தியாவிற்கு வரும் புலம்பெயர்ந்த பறவைகளின் எண்ணிக்கை ஒருகாலத்தில் அதிகமாக இருந்தது. ஆனால் இன்று அந்த நிலை அடியோடு மாறிவிட்டது. இதற்கு காரணம் மாறி வரும் சுற்றுப்புறச்சூழல், வேட்டை, தண்ணீர் இல்லாத நிலை, நச்சு வாயுக்கள், ரசாயனங்கள் அதிகரிப்பு, பாதுகாப்பில்லாத சூழல்... என கூறிக்கொண்டே செல்லலாம்.

இந்திய மாநிலங்களில் தமிழகம் வனப்பரப்பில் 17% பெற்று 14-ம் இடத்தில் உள்ளது. தமிழகத்தில் 60 குடும்பங்களைச் சேர்ந்த 360 வகையான பறவைகள் வாழ்ந்து வருகின்றன. நீர்நிலைகளில் பறவைகளை பாதுகாக்க 13 பகுதிகளை பறவைகள் சரணாலயங்களாக தமிழக அரசு அறிவித்துப் பாது காத்து வருகிறது.

ஆண்டுதோறும் செப்டம்பர்-அக்டோபர் மாதங்களில் தமிழக நீர்நிலைகளை நாடி லட்சக்கணக்கான பறவைகள் வந்து, ஏப்ரல்-மே மாதங்களில் தங்கள் இருப்பிடங்களுக்குத் திரும்பி செல்கின்றன. சாதாரணமாக காணும் வெள்ளைக் கொக்கு, நாரைகள், நீர்க்காகங்கள் யாவும் தமிழகத்திற்கே உரித்தான பறவைகள் ஆகும்.