തിയോഡർ കലൂസ നീന്തൽ പഠിച്ചതെങ്ങനെ?

ശാസ്ത്രരംഗത്തെ നർമകഥകൾ

- ഡോ. എൻ. ഷാജി

തിയോഡർ കലൂസ (Theodor Kaluza, 1885-1954) മിടുക്കനും രസികനുമായ ഒരു ശാസ്ത്രജ്ഞനായിരുന്നു. ജർമനിയിൽ ജനിച്ച അദ്ദേഹം ആൽബർട്ട് ഐൻസ്റ്റൈന്റെ ആപേക്ഷികതാസിദ്ധാന്തവുമായി ബന്ധപ്പെട്ട ചില ഗവേഷണങ്ങളുടെ പേരിലാണ് പ്രസിദ്ധനായത്. ആൽബർട്ട് ഐൻസ്റ്റൈൻ അദ്ദേഹത്തിന്റെ ആപേക്ഷികതാ സിദ്ധാന്തത്തിലൂടെ സ്ഥലത്തെയും കാലത്തെയും ഒരുമിച്ചുചേർത്ത് നാലുമാനങ്ങളുള്ള സ്ഥലകാലം (space-time) എന്ന ആശയം ശാസ്ത്രലോകത്ത് അവതരിപ്പിച്ചിരുന്നുവല്ലോ. ഈ ആശയം പിന്നീട് ഗുരുത്വാകർഷണത്തെ വിശദീകരിക്കാനും സഹായകരമായി. എന്നാൽ, നാലുമാനമാകാമെങ്കിൽ എന്തുകൊണ്ട് അഞ്ചു മാനമായിക്കൂടാ എന്നു ചിന്തിച്ച കലൂസ ഇക്കാര്യത്തിൽ ഒരു പടികൂടി മുന്നോട്ടുനീങ്ങി. ചതുർമാന സ്ഥലകാലത്തിന് ഒരു മാനത്തെ കൂടി ചേർത്ത് 5 മാനങ്ങളുള്ള (Five dimensional) ഒരു ലോകത്തെ പരിഗണിച്ചാൽ ഗുരുത്വാകർഷണത്തോടൊപ്പം വിദ്യുത്കാന്തിക സിദ്ധാന്തത്തെക്കൂടി സ്വാഭാവികമായി വിശദീകരിക്കാൻ കഴിയുമെന്ന് അദ്ദേഹം കാണിച്ചുതന്നു. വൈദ്യുതി, കാന്തികത, പ്രകാശം എന്നിവയെ സംബന്ധിച്ച വിവിധ നിയമങ്ങളെ വിശദീകരിക്കുന്ന സമഗ്രമായ സിദ്ധാന്തമാ