సేవాయజ్ఞానికి శ్రీరామకృష్ణులే ప్రేరణ!

సరిగ్గా 127 సంవత్సరాల క్రితం 1897 మే 1వ తేదీన స్వామి వివేకానంద తమ గురుదేవుల పేరిట 'రామకృష్ణ మిషన్'ను స్థాపించారు.

- 

సరిగ్గా 127 సంవత్సరాల క్రితం 1897 మే 1వ తేదీన స్వామి వివేకానంద తమ గురుదేవుల పేరిట 'రామకృష్ణ మిషన్'ను స్థాపించారు. అంతకుముందే నెలకొల్పిన రామకృష్ణ మఠానికి ఇది కవల సంస్థ. ఈ రెండూ నేడు పలు శాఖలుగా విస్తరించి, సమాజానికి వివిధ సేవలు అందిస్తున్నాయి. తద్వారా శ్రీరామకృష్ణుల విశ్వజనీన సందేశాన్ని జనబాహుళ్యంలోకి తీసుకువెళ్ళేందుకు కృషి చేస్తున్నాయి. ఈ సంస్థలలాగానే ఇవి అవలంబించే త్యాగం-సేవ ఆదర్శాలు కూడా కవలలని చెప్పవచ్చు. ఇలా ఒక సాధు సంఘం ఉన్నత ఆదర్శాన్ని చేపట్టి, శతాబ్దానికిపైగా నిరాటంకంగా సమాజానికి తమ వంతు సేవలందించడం మామూలు విషయం కాదు. ఇది సాక్షాత్తూ అవతారం తలపెట్టిన కార్యం. శ్రీరామకృష్ణుల మిషన్! కాబట్టి రాబోయే తరాల్లో కూడా ఇది వర్ధిల్లుతుందనడంలో ఏమాత్రం సందేహం లేదు.

ఉపనిషత్తులు బోధించిన సేవాధర్మం

సాధారణంగా 'మిషన్' అనగానే ఒక సేవాసంస్థ అనే అభిప్రాయం ఉంది. కానీ, 'రామకృష్ణ మిషన్' కేవలం సేవాసంస్థ కాదు, ఇది ఒక ఆధ్యాత్మిక సంస్థ! జీవునిలోని శివుణ్ణి ఆరాధించి, సేవించే ఆధ్యాత్మిక సేవాసంస్థ. దీనికి ప్రేరణ శ్రీరామకృష్ణులే! ఈ విషయంగా ఆయన కొన్ని సందర్భాలలో "నిష్కామ భావంతో ఎవరికైనా ఏదైనా దానం చేసినట్లయితే, నిజానికి దాత తనకు తానే ఉపకారం చేసుకుంటున్నాడు. అది పరోపకారం కాదు. సకల భూతాలలోనూ భగవంతుడు విరాజిల్లు తున్నాడు. కాబట్టి అలా సేవించడం వల్ల ఆ భగవంతుణ్ణి సేవించినట్లవుతుంది. స్వర్గం, పేరు ప్రతిష్ఠలు, సేవలందుకుంటున్నవారి నుండి ప్రతిఫలం...ఇవేవీ ఆశించకుండా నిష్కామకర్మ చేసిన వ్యక్తి తనకు తనే మేలు చేసుకున్నవాడవుతాడు”, “సన్న్యాసి కూడా కర్మలన్నింటినీ నిష్కామ భావంతో నిర్వర్తించాలి.అయితే, గృహస్థులకులాగ అతడికి లౌకిక కర్తవ్యాలు ఉండవు' అని సూచించారు.