കുറൂരമ്മയുടെ അനുഗ്രഹവും ഗുരുവായൂരപ്പന്റെ കടാക്ഷവും

പുതുമന ശ്രീജിത്ത് നമ്പൂതിരി ഗുരുവായൂരിലെ പുതിയ മേൽശാന്തിയായി തെരഞ്ഞെടുക്കപ്പെട്ടു.

- ശ്രീകുമാർ ഗുരുവായൂർ (9447725649)

കഴിഞ്ഞ ഏഴുതവണ അപേക്ഷിച്ചെങ്കിലും ഗുരുവായൂരപ്പൻ കനിഞ്ഞനുഗ്രഹിച്ചത് എട്ടാം തവണയാണ്. ഭഗവാന്റെ കടാക്ഷം, അതു നേടുക അത എളുപ്പമല്ല. തന്നിൽ വിശ്വാസമർപ്പിക്കുന്ന ഭക്തനെ പരമാവധി തന്നിലേയ്ക്ക് ചേർത്തു പിടിക്കാൻ ചില തമാശകളും കുറുമ്പുമൊക്കെ ഭഗവാൻ കാട്ടാറുണ്ട്. ഒടുവിൽ സ്നേഹാദരങ്ങളോടെ തന്നിലേക്ക് ചേർത്തുപിടിക്കും. ഭക്തനും ഭഗവാനും തമ്മിലുള്ള അന്തരം അതോടെ ഇല്ലാതാകുന്നു. തന്റെ മുന്നിലെത്തി സ്വയം അർപ്പിക്കപ്പെടുന്ന ഏതൊരു ഭക്തനേയും ഗുരുവായൂരപ്പൻ കൈവിടാറില്ല. കാരുണ്യവാനായി അവന്റെ പരിദേവനങ്ങൾക്ക് അറുതി വരുത്തുന്നു.

ഗുരുവായൂരപ്പനെ തഴുകിത്തലോടി, അഭിഷേകങ്ങൾ ചെയ്ത് കുളിപ്പിച്ച് മോടിയോടെ വസ്ത്രങ്ങളും ആടയാഭരണങ്ങളുമണിയിച്ച് ചൈതന്യഭാവത്തിൽ ഒരു നോക്കുകാണുവാനും ഇഷ്ട ഭക്ഷണം നിവേദ്യമായി നൽകുവാനുമുള്ള ആഗ്രഹത്തോടെ കഴിഞ്ഞ ഏഴുതവണ ഭഗവതവ ചെയ്യാൻ വേണ്ടി ശ്രീജിത്ത് നമ്പൂതിരി അപേക്ഷകൾ അയച്ചെങ്കിലും ഭഗവാൻ കടാക്ഷിച്ചതേയില്ല. മുപ്പത്തിയാറാം വയസ്സിൽ യൗവനം കടന്നപ്പോൾ ഭഗവാൻ കടാക്ഷിച്ചു. എട്ടാം തവണ നൽകിയ അപേക്ഷ ഭഗവാൻ കൃപാകടാക്ഷത്തോടെ സ്വീകരിച്ചു.

ശ്രീജിത്ത് നമ്പൂതിരിയുടെ കുടുംബത്തിൽ നിന്നാരും മുൻപ് ഗുരുവായൂരിൽ മേൽശാന്തിയായിട്ടില്ല. അതുകൊണ്ടുതന്നെ കുടുംബാംഗങ്ങൾക്കെല്ലാം അടക്കാനാകാത്ത ആഹ്ലാദവും ആനന്ദ നിർവൃതിയുമാണുണ്ടായത്.