உள்ளூராட்சி தேர்தல் முடிவுகள் மலையக-வடக்கு கிழக்கின் அரசியற் கட்சிகளுக்கு எச்சரிக்கையா?

இடம்பெற்று முடிந்த உள்ளூராட்சி சபைத் தேர்தல் இன்றைய தலை முறையினர் எதனை எதிர்பார்க்கின்றனர், எவ்வாறு செயற் படத் தயாராக உள்ளனர் என்பதனை சுட்டிக் காட்டும் தேர்தலாக அமைந்துவிட்டது.

- பெ. முத்துலிங்கம்

உள்ளூராட்சி சபைத் தேர்தலின் போது ஊர்க் காரர், சொந்தக்காரர், சாதிக்காரர், தெரிந்தவர், ஊருக்கு நல்லது செய்பவர், ஆட்சியிலிருக்கும் கட்சியைச் சார்ந்தவர் என்ற தகுதிச்சான்றிதழ்களே வாக்காளர்களின் விருப்பைத் தீர்மானிக்கும் அளவுகோளாக இருந்து வருகின்றன. முடிந்த உள்ளூராட்சி தேர்தலிலும் இவ் அளவுகோள்கள் ஓரளவு பங்கினை வகித்துள்ள போதிலும் இத்தேர்தலின் போது புதிய செய்தி ஒன்றை வாக்காளர்கள் சொல்லியிருக்கின்றனர்.

பொதுவாக உள்ளூராட்சி தேர்தலின் போது மேற்கூறிய தகுதிச்சான்றிதழ்களுடன் ஆளும் கட்சியைச் சார்ந்தவர்களுக்கே பெரும்பாலும் வாக்களிப்பர். ஆனால் இம்முறை ஆளும் கட்சியினர் உள்ளூராட்சி மன்றங்களில் அதிகமான ஆசனங்களை கைப்பற்றிய போதிலும் ஆட்சி அமைக்கக்கூடிய பெரும்பான்மையைப் பெறவில்லை.

(தேசிய மக்கள் சக்தி மேற்கூறப்பட்ட சான்றிதழ்களை கொண்டவர்கள் என்றதன் அடிப்படையில் வேட்பாளர் வாய்ப்பினை வழங்கவில்லை.)

தேசிய மக்கள் சக்தி, 2024 ஆம் ஆண்டு இடம்பெற்ற ஜனாதிபதி தேர்தலில் 42.31 சதவீத (5,634,915) வாக்கினைப் பெற்றிருந்ததுடன் அதே ஆண்டில் நடந்த பாராளுமன்றத் தேர்தலில் 61.56 சதவீத (6,863,186) வாக்கினைப் பெற்றது. ஆனால் உள்ளூராட்சி தேர்தலில் 43.26 சதவீத (4,503,930) வாக்குகளைப் பெற்றுள்ளது. இதேவேளை, பெரிய எதிர்க்கட்சியான ஐக்கிய மக்கள் சக்தி ஜனாதிபதித் தேர்தலில் 32.76 சதவீத (4,363,035) வாக்குகளைப் பெற்றதுடன் பாராளுமன்றத் தேர்தலில் 17.66 சதவீத (1,968,716) வாக்குகளையே பெற்றுள்ளது.