ప్రజారోగ్య సంరక్షణలో డ్రోన్ల పాత్ర

డ్రోన్లేంటీ! ఔషధాలు చేరవేయడమేంటీ? అని ఆశ్చర్యపోతున్నారా!

- · యేచన్ చంద్ర శేఖర్

డ్రోన్లేంటీ! ఔషధాలు చేరవేయడమేంటీ? అని ఆశ్చర్యపోతున్నారా! నిజమే. ఇటీవల మేఘాలయ ప్రభుత్వం భారతదేశంలో ప్రజారోగ్యానికి కొత్త శకానికి నాంది పలికే విధంగా దేశంలోనే ప్రప్రథమంగా మేఘాలయ హెల్త్ సిస్టమ్స్ స్ట్రెంథనింగ్ ప్రాజెక్ట్ (ఎంహెచ్ఎస్ఎస్పి) ను ప్రారంభించి డ్రోన్ల ద్వారా మారుమూల ఆరోగ్య కేంద్రాలకు సైతం కేవలం ముప్ఫై నిమిషాల్లోనే ఔషధాలను చేరవేసే రాష్ట్రంగా అవతరించింది.

మేఘాలయ ప్రభుత్వం ఈ వినూత్నమైన విధానాన్ని ప్రవేశపెట్టిన తరువాత సవాళ్లతో కూడిన కొండ ప్రాంతాలలో ఆరోగ్య సంరక్షణ పరిస్థితి బాగా మెరుగుపడింది. ఈ రాష్ట్రంలో, డ్రోన్లు మారుమూల ఆరోగ్య కేంద్రాలకు రవాణా సమయాన్ని గణనీయంగా తగ్గించడం ద్వారా ఔషధ రవాణాలో విప్లవాత్మక మార్పులకు తెరలేపాయి. కఠినమైన భౌగోళిక పరిస్థితులు, పేలవమైన రోడ్డు వ్యవస్థల కారణంగా రోడ్డు మార్గం ద్వారా లేదా కాలినడకన రాష్ట్రంలోని మారుమూల ప్రాంతాలలో ఉండే ఆరోగ్య కేంద్రాలు కొన్ని గంటలు పట్టే ఔషధాల చేరవేత ఇప్పుడు డ్రోన్ల సహాయంతో కేవలం ముప్ఫై నిమిషాల్లోనే సాధ్యమవుతోంది.

భారతదేశంలో ఆరోగ్య సంరక్షణ కోసం చివరి వినియోగదారులకు డ్రోన్ ఆధారిత ఔషధాలు, ఇతర వైద్య సామాగ్రి రవాణా ఇకపై సుదూర కల ఎంతమాత్రం కాదు.

మేఘాలయ ఆరోగ్య మంత్రి అంపరీన్ లింగ్డో ఈ ప్రాజెక్టు ఒక ప్రతిష్టాత్మక విజయం అని గర్వంగా అభివర్ణిస్తూ ఈ రోజు తాము ఒక సాంకేతిక మైలురాయిని చేరుకోవడమే కాకుండా, ఆరోగ్యం విషయంలో తమ రాష్ట్రంలో ఎవరూ వెనుకబడి ఉండకుండా చూసుకుంటున్నామని, ఇది తాము కలలు కనే మేఘాలయ డ్రోన్ ఆధారిత గ్రామీణ ఆరోగ్య సంరక్షణ సదుపాయం అని అన్నారు.

హబ్ అండ్ స్పోక్ విధానం

మేఘాలయ ప్రభుత్వ త్వరితగతిన ఆ రాష్ట్రంలోని మారుమూలల్లో ఉన్న ఆరోగ్య కేంద్రాలకు ఔషధాలను చేరవేసేందుకు 'హబ్ అండ్ స్పోక్ వ్యవస్థకు శ్రీకారం చుట్టింది. ఇక్కడ సెంట్రల్ హబ్ (జెంగ్జల్ సబ్ డివిజనల్ హాస్పిటల్ లాంటిది) వివిధ మారుమూల ఆరోగ్య కేంద్రాలకు (నోడ్స్) డ్రోన్లను పంపుతుంది. ఈ డ్రోన్లు అవసరమైన ఔషధాలు, టీకాలు, రక్త నమూనాలను చేరవేస్తాయి.