మీ పెళ్లి..బంగారం గాను!

మానవ జీవన మనుగడకు ఊపిరులూదుతున్న స్త్రీ, పురుష సంబంధాలను నైతికంగా, న్యాయాత్మకంగా సుస్థిరం చేస్తూ పెనవేసే ఓ అద్భుతమైన శాశ్వత సాంప్రదాయ సహజీవన వ్యవస్థ యే వివాహ వ్యవస్థ.

- నీలం సంపత్

మానవ జీవన మనుగడకు ఊపిరులూదుతున్న స్త్రీ, పురుష సంబంధాలను నైతికంగా, న్యాయాత్మకంగా సుస్థిరం చేస్తూ పెనవేసే ఓ అద్భుతమైన శాశ్వత సాంప్రదాయ సహజీవన వ్యవస్థ యే వివాహ వ్యవస్థ. ఐతే ప్రపంచంలోనే అత్యంత దృఢమైన వివాహ వ్యవస్థగా పేరు గాంచిన భారతీయ వివాహ వ్యవస్థలో మంగళ సూత్రంతో పాటు పుస్తెలతాడు ప్రధాన

పాత్రను ధరిస్తుండడం గమనార్హం. హిందూ సాంప్రదాయం ప్రకారం తాళిబొట్టు బంగారంతోనే చేయించాలని శాస్త్రాలు తెలియజేస్తున్నాయి.

వాటికి తోడుగా నల్లపూసల గొలుసులో అనివార్యంగా కనపడే గుండ్లు సైతం బంగారంతోనే చేయించడం ఆనవాయితీగా కొనసాగుతున్న వైనం బహిరంగ రహస్యమే. వధువుకు ముక్కుపుడక, చెవిరింగులు వివాహ మహోత్సవంలో భాగంగా వధువు చేతికి ధరింపజేసే ప్రధానపు ఉంగరం కూడా బంగారంతోనే చేయించడం పరిపాటి.

వివాహ వేడుక కన్నా ముందు జరిగే ఎంగేజ్ మెంట్ భాగంగా కాబోయే వధూవరులు ఇద్దరూ పరస్పరం ఒకరికొకరు బంగారంతో చేసిన ఉంగరాలను ధరింప జేసుకోవడం సైతం బలమైన వివాహ సాంప్రదాయంలో భాగంగా కొనసాగుతూ వస్తుండడం తెలిసిందే.

వీటికి అదనంగా వధూవరుల కుటుంబాల ఆర్థిక పరిస్థితుల వెసులుబాటుని బట్టి వధువుకు బంగారంతో చేయించే కర్ణాభరణాలు, కంఠాభరణాలు, ముంజేతికి బంగారు గాజులు, వరుడికి చేతి వేలుకు ఓ రింగ్తో పాటు మెడకో బంగారు గొలుసు, వీలైతే చేతికో బంగారు బ్రేస్లెట్ చేయించి గౌరవించడం ఓ ఆనవాయితీగా కొనసాగుతున్న వైనం గమనార్హం. ధనిక, పేద భేదం లేకుండా పెళ్ళి తంతుకు సంబంధించిన సాంప్రదాయాలని గౌరవించాల్సిందే!?

భారతదేశ వివాహ వేడుకలో కోట్ల రూపాయల సంపద కలిగిన కోటీశ్వరులతో పాటు మధ్య తరగతి, దిగువ మధ్య తరగతులకు చెందిన వారి వరకూ ప్రతి వివాహంలో ఎంగేజ్ మెంట్ నుండి వివాహం వరకు: ఎంగేజ్ మెంట్ రింగ్ నుండి తాళిబొట్టు వరకు బంగారు ఆభరణాలను అనివార్యంగా చేయించాల్సిందే. ఈ నేపథ్యంలో మన దేశ వివాహ వ్యవస్థలో బంగారం ఓ నిర్ణయాత్మక పాత్రని పోషిస్తుందనడంలో ఎలాంటి సందేహం లేదు. దీనికితోడు సౌందర్య పిపాసులైన భారతీయ స్త్రీలు పండగలకూ,పబ్బాలకే కాకుండా కుటుంబ పరంగా జరుపుకునే అన్ని ఉత్సవాలలో పెద్ద మొత్తంలో బంగారు ఆభరణాలను ధరించి సమాజంలో తమ డాబునూ, దర్పాన్ని, హోదాను ప్రదర్శించుకోవాలనే కోరిక కూడా భారతీయ సమాజంలో బంగారం డిమాండ్ని విపరీతంగా పెంచుతుందనే సత్యాన్ని జీర్ణించుకోకతప్పదు.

సాంప్రదాయేతర వివాహాల్లోనూ తాళి తప్పని సరే!