మూసీ ప్రస్థానం

తమలపాకుతో నువ్విట్లంటే..తలుపుచెక్కతో నేనట్లంట అన్నట్టుగా ఉంది ప్రకృతి వ్యవహరిస్తున్న తీరు.

- తిరుమల రావు

తమలపాకుతో నువ్విట్లంటే..తలుపుచెక్కతో నేనట్లంట అన్నట్టుగా ఉంది ప్రకృతి వ్యవహరిస్తున్న తీరు. ప్రకృతితో మానవుడు చెలగాటమాడే కొద్దీ అంతకు రెట్టింపు స్థాయిలో ప్రకృతి విరుచుకుపడుతున్నది.

మానవుడి నిర్వాకం వల్లనే ఎంతో అహ్లాదకరంగా ఉండే ప్రాంతాలు, నదులు, చెరువులు, కుంటలు కాలుష్య కాసారాలుగా మారుపోతున్నాయి. ఒకనాడు జంటనగరాలు మంచినీరుతో పాటు పరిసర గ్రామాలకు సాగునీరు అందించిన మూసీనది, నేడు దుర్గాందభుయీష్టంగా మారి భరించలేని దుర్వాసన వేదజల్లుతున్నది. ఇలా మూసీ ఈ దుస్థితికి చేరుకోవడం ఒకటి రెండు రోజుల్లో జరగలేదు. గత నాలుగైదు దశాబ్దాలుగా పాలకుల నిర్లక్ష్యం, వీటన్నింటినీ మించి కొందరి అధికారుల అవినీతితో మూసీ పరిస్థితి ఇలా దిగజారిపోయింది. వాస్తవంగా మూసీ పరివాహక ప్రాంతాల్లో ఉన్న, గ్రామాల్లో ఉన్న చెరువుల్లో ఆనాడు మంచినీరు తాగేవారు.అంతకు ముందు చరిత్రను చూసినా, ఇక్కడి చెరువుల్లో నుంచి కాకతీయ రాజులు వరంగల్కు తీసుకుపోయేవారని చెబుతున్నారు. రంగారెడ్డి జిల్లా ఘట్కేసర్ మండలం ఎదులాబాద్లో ఉన్న చెరువును అందుకు ఉదహరించవచ్చు.

అందుకు నేటికి సజీవ సాక్షంగా నిలిచిన ఆనాటి కాకతీయులు చెక్కించిన శిలాసాసనం దర్శనమిస్తున్నది. 'శక వర్షంభుల్ 1515 (క్రీస్తు శకం 1593) శ్రీముఖ నామ సంవత్సరం ముందు మాఘమాసంలో శుక్ల పక్షం పౌర్ణమి మాసం గురువారం నాడు సర్వజనుల శ్రేయస్సు అభివృద్ధిని గాంచి వేదవిజ్ఞులు, పురాణాజ్ఞులు పండితుల సమక్షంలో సముద్రమును తలపించేటి తటాకం నిర్మించడం ఈ ప్రాంతమంతా స్వచ్ఛమైన చల్లని గాలులతో పుష్పవాసనలతో సాక్షాత్తు లక్ష్మీనారాయణుల నివాసమేమోనన్న తలంపు తెచ్చుకున్నాడు'. తదితర వ్యాఖ్యలు నేటికి ఎదులాబాద్లో ఉన్న శిలాసానంపై దర్శనమిస్తాయి. పాలకుల నిర్వాహకంతో మూసీతో పాటు ఇలాంటి చెరువులెన్నో కాలుష్యకాసారాలుగా మారిపోయాయి.