యుగ పురుషుడు

1948 జనవరి 30న గాంధీజీ భౌతికంగా తన తనువును వదిలి అస్తమించారు.

- ఫిజిక్స్ అరుణ్కుమార్

1948 జనవరి 30న గాంధీజీ భౌతికంగా తన తనువును వదిలి అస్తమించారు. అయినా నేటికీ ఆధునిక ప్రపంచ వటానికి పాఠ్య పుస్తకమై సత్యప్రకాశంతో, అహింసా వినీలాకాశంలో విశ్వ శాంతి పరిమళాలను వెదజల్లుతూనే వున్నారు. ప్రతి సంవత్సరం జనవరి 30న మన దేశమంతటా అమరవీరుల దినోత్సవంగా జరుపుకుంటూ స్వాతంత్ర్య సంగ్రామంలో తమ ప్రాణాలను త్యాగం చేసిన మహానుభావులను స్మరించికుంటూ వారందరికీ శ్రద్ధాంజలి ఘటిస్తున్నాం. ఈ శతాబ్దపు వివిధ రంగాల్లో ప్రపంచ ప్రముఖులుగా వున్న ఆల్బర్ట్ ఐన్ స్టీన్, ఆంగ్ సాన్ సూకీ, రవీంద్రనాథ్ ఠాగూర్, సివిరామన్, బెర్నార్డ్ షా, మార్టిన్ లూథర్ కింగ్, దలైలామా, నెల్సన్ మండేలా, స్టీవ్ జాబ్స్, కైలాష్ సత్యార్థి, బరాక్ ఒబామా, చార్లీ చాప్లిన్ తదితరులు వంటివారు సైతం గాంధీజీ నుంచి స్ఫూర్తి పొందిన వారే. ఈ శతాబ్దపు అత్యంత ప్రభావశీల వ్యక్తుల్లో ప్రముఖంగా వినిపిస్తూ కనిపించే వ్యక్తిత్వపు హిమగిరి శక్తి పేరు గాంధీజీ. కొన్ని సందర్భాల్లో గౌతమ బుద్ధుడు, శ్రీకృష్ణుడు వంటి వారి బోధనలను ఆచరించి చూపిన కారణజన్ముడు, యుగపురుషుడు గాంధీజీ అని విఖ్యాత ప్రముఖులు పోల్చుతుంటారు. సత్యం, అహింస పునాదులపై విశ్వమానవతా ప్రేమ శిఖరాన్ని తన సందేశంగా, మన దేశపు ముఖచిత్రంగా నిలిపినవారు గాంధీజీ. ఆయన మార్గంలో నడిచి, అందరికీ ఆదర్శంగా నిలిచి ఎంతోమంది నోబెల్ బహుమతులు గెలిచారు.