விடியலுக்கான ஒளியாய் விளங்கும் பெருமக்கள்

தமிழ் முரசு, சிங்கப்பூர்த் தமிழ் ஆசிரியர் சங்கம், தமிழ்மொழி கற்றல், வளர்ச்சிக் குழு இணைந்து வழங்கும் நல்லாசிரியர் விருதுகள் இவ்வாண்டு தொடக்கப்பள்ளி, உயர்நிலைப் பள்ளிப் பிரிவுகளில் தலா இரு ஆசிரியர்களுக்கு வழங்கப்பட்டன.

- லாவண்யா வீரராகவன்

ஒருவருக்கு தேசிய கல்விக் கழக சிறந்த பயிற்சி ஆசிரியர் விருதும் மற்றொருவருக்கு வாழ்நாள் சாதனையாளர் விருதும் வழங்கிச் சிறப்பிக்கப்பட்டது.

தாம் ரசித்த மொழியைப் பிறர் ரசிக்க விழையும் சரத்குமார்

உயர்நிலைப் பள்ளிப் பிரிவுக்கான நல்லாசிரியர் விருதுபெற்ற குவீன்ஸ்டவுன் உயர்நிலைப் பள்ளி ஆசிரியர் சரத்குமார் கணசேகரன்.

தமிழ்ப் பயன்பாட்டின் தற்போதைய நிலைகுறித்த பதற்றமும் தாம் ரசித்துப் படித்த மொழியை அடுத்த தலைமுறையிடம் கொண்டுசேர்த்துவிட வேண்டும் என்கிற துடிப்பும் தம்மை ஆசிரியராகத் தூண்டியதாகச் சொன்னார் இவ்வாண்டுக்கான நல்லாசிரியர் விருது பெற்ற சரத்குமார் கணசேகரன், 31.

"கதைப் புத்தகங்களும் அவற்றில் எழுத்தப்பட்டுள்ள நுணுக்கமான உருவங்களும் என்னைத் தமிழ் மொழியின்பால் ஈர்த்தன. அவற்றை இப்போதைய தலைமுறையினர் பார்க்கும் விதம் எனக்கு வியப்பளிக்கிறது," என்ற திரு சரத், சிறு சிறு அழகியல் கூறுகள்மூலம் மொழி மீதான ரசிப்பை மாணவர்களிடம் புகுத்தும் முயற்சியில் தொடர்ந்து ஈடுபடுகிறார்.

குவீன்ஸ்டவுன் உயர்நிலைப் பள்ளி ஆசிரியரான இவர், உயர்நிலைப் பள்ளிப் பிரிவில், 2025க்கான நல்லாசிரியர் விருதைப் பெற்றார்.

வீடுகளில் தமிழில் பேசும் பழக்கம் குறைந்துள்ளது குறித்து கவலை தெரிவித்த இவர், பயன்முறைக் கற்றல் திட்டம், மெய்நிகர்த் தொழில்நுட்பம் இரண்டையும் திறம்பட பயன்படுத்தி தமிழ்மொழிப் பாடம் கற்பித்து வருவதாகவும் சொன்னார். கடந்த ஆண்டு மின்னிலக்கக் கல்வியறிவுத் திறன்கள் குறித்த இணையவழி வகுப்புகளையும் இவர் வழிநடத்தினார்.

"விருது பெற்றவர்களிலேயே இளையவர் என்பது கனவுபோல் உள்ளது. அதனை நனவாக்க, என் திறன்களை வெளிக்காட்ட வாய்ப்பு கிடைத்ததில் மகிழ்ச்சி," என்றார் திரு சரத்.

மொழியை அடுத்த தலைமுறைக்கு எடுத்துச் செல்ல உழைப்பவர்

உயர்நிலைப் பள்ளிப் பிரிவுக்கான நல்லாசிரியர் விருதுபெற்ற புக்கிட் வியூ உயர்நிலைப் பள்ளியின் மூத்த ஆசிரியர் இராமசாமி ஸ்டாலின்.