இலங்கையின் இன்றைய கல்வி நிலைமைகளும் மாணவர்களின் எதிர்பார்ப்புகளும்

இன்று பல நாடுகள் வெற்றிகரமான கல்விச் செயற்பாடுகள் ஊடாக அபிவிருத்தி இலக்குகளை அடைந்து உலகின் முன்னணி நாடுகளாக விளங்குகின்றன.

- சிவசாமி மனோகரன், ஓய்வு நிலை சிரேஷ்ட விரிவுரையாளர், மகாவலி தேசிய கல்வியியற் கல்லூரி.

இந்நாடுகளின் கல்வி இலக்குகளும் கலைத்திட்டச் செயற்பாடுகளும் எதிர்பார்த்த தொழிற்துறைசார் மற்றும் பொருளாதார அபிவிருத்தி இலக்குகளை எட்டுவதற்குப் பெரிதும் பங்களிப்புச் செய்துள்ளன. ஆயினும், இலங்கையிலோ இவற்றிற்கு மாறான போக்குகளே காணப்படுகின்றன.

இலங்கையின் இன்றைய கல்வி நிலைமைகளை ஆராய்ந்து பார்க்குமிடத்து, மிக நீண்டகாலமாகவே காலாவதியான கலைத்திட்டமொன்றை மிகவும் பிரயாசையுடன் போதித்து வருகின்ற நிலைமைகளையே காணமுடிகிறது. கல்விக்கும் வேலை உலகுக்கும் இடையே தொடர்பற்ற நிலைமையொன்றே நிலவுகிறது. இதனால் மாணவர்களிடையே பாடசாலை கல்வி முறை தொடர்பான உகப்பற்ற மனநிலையே காணப்படுகிறது. இந்நிலைமை தொடருமாயின் மாணவர்களிடையே பாடசாலை கல்வி மீதான நம்பிக்கை சீர்குலையும் நிலை தோன்றலாம். இது கசப்பான உண்மை என்பதைக் கல்விப் புலம் சார்ந்த நாம் அனைவரும் வருத்தத்துடனேயே புரிந்து கொள்ள வேண்டும்.

இன்றைய விஞ்ஞான உலகிலே உலக நாடுகள் பல 21ஆம் நூற்றாண்டுக்கு உரித்தான சவால்களை வெற்றி கொள்ளும் வகையிலே கலைத்திட்டச் செயன்முறைகளை உருவாக்கி விண்வெளி ஆய்வுகள் ஊடாக நிலவில் கால்பதித்து ஆய்வுகளை மேற்கொள்கின்றன. ஆனால், எமது நாட்டின் கலைத்திட்டத்தில் நாம் நிலத்தில் கால் பதித்து நிலவைப் பார்த்து வட்ட நிலா வா வா... வண்ண நிலா வா வா... பட்டு நிலா வீசி வா... என நிலவை பூமிக்கு அழைக்கின்ற மாயச் செயற்பாடுகளில் ஈடுபடுகிறோம். நிலவைக் கண்ணாடியில் பிரதிபலிக்கச் செய்தும் நீர் நிறைந்த பாத்திரத்தில் நிலவை நிழலாகக் காண்பித்தும் பிள்ளைகளை குறுகிய சிந்தனை வட்டத்துக்குள் முடக்குகின்றோம். இத்தகைய கலைத்திட்ட உள்ளடக்கங்கள் அன்றைய காலச்சூழலுக்குப் பொருத்தமானதாக இருந்திருப்பினும் இன்றைய சூழுலில் 21ஆம் நூற்றாண்டு மாணவர்களை நிலவில் கால் பதிக்கக் கூடியவர்களாக உருவாக்குவதற்கு இத்தகைய கலைத்திட்டங்களால் பங்களிப்பு வழங்க முடியுமா? இதற்கு உதாரணமாக எமது நடைமுறைக் கலைத்திட்டத்திலுள்ள பல பாடங்களின் உள்ளடக்கங்களை ஆதாரமாகக் கொண்டு பல விடயங்களை கோடிட்டுக் காட்டலாம். கட்டுரை நீண்டுவிடலாம் என்ற காரணத்தினாலேயே சில உதாரணங்களுடன் மட்டுப்படுத்திக் கொள்கிறேன்.