13 வருடங்கள் பாடசாலை கல்வியை பெறாது “எந்தக் குழந்தையும் இடைவிலகக் கூடாது”

13 வருடங்கள் கல்வியை பெறாமல் பாடசாலைகளை விட்டுச் செல்லக்கூடாது என்றும் பிள்ளைகளுக்கு சிறுவர் வாழ்க்கையை அனுபவிக்கக்கூடியவாறும், அவர்கள் 13 வருட கட்டாய கல்வியுடன் அவர்களுக்கு சிறந்த எதிர்காலத்தை உருவாக்கக்கூடியவாறும் கல்வி மறுசீரமைப்பு நடைமுறைப்படுத்தப்படும் ஜனாதிபதி அனுரகுமார திசாநாயக்க தெரிவித்தார்.

- 

பாராளுமன்றத்தில் வியாழக்கிழமை (24) அன்று நடைபெற்ற கல்வி மறுசீரமைப்பு தொடர்பான சபை ஒத்திவைப்பு வேளை பிரேரணை மீதான விவாதத்தில் கலந்துகொண்டு உரையாற்றுகையிலேயே ஜனாதிபதி இதனை கூறினார்.

தனது உரையில் ஜனாதிபதி மேலும் தெரிவிக்கையில், கல்வி மறுசீரமைப்பு தொடர்பான கலந்துரையாடல்கள் நடத்தப்படும் போது பலரும் பாடங்கள் தொடர்பில் கதைக்க ஆரம்பித்துள்ளனர். வரலாறு உள்ளடக்கப்படுமா? இல்லையா? என்றும் கலந்துரையாடினர். ஆனால் இது பாடத்திட்டங்களை மட்டும் அடிப்படையாகக் கொண்ட திருத்தமாக இந்த யோசனைத் திட்டம் இருக்காது.

எமது முழு சமூகம், பொருளாதாரம் மற்றும் எமது நாட்டை புதிய மாற்றத்திற்குக் கொண்டு செல்லும் மறுசீரமைப்பாக அமையும் தற்போதைய கல்வி முறைமையும் அதன்மூலம் உருவாகியுள்ள இளைஞர் சந்ததி தொடர்பிலும் அதேபோன்று இந்த கல்வி முறைமையால் ஏற்பட்டுள்ள பொருளாதாரம் தொடர்பிலும் எவருக்கும் திருப்தியடைய முடியாது. இதனால் எமக்கு மிகவும் பரந்துபட்ட கல்வி மறுசீரமைப்பு அவசியமாகும்.

இந்த நாட்டை கட்டியெழுப்புவதற்காக எம்மிடம் இருக்கும் முக்கிய வளமாக மனித வளங்களே உள்ளன. இதனால் இந்த மனித வளத்தைப் பலப்படுத்தி எவ்வாறு நாட்டை புதிய நிலைக்குக் கொண்டு செல்வது என்றே பார்க்கின்றோம். வறுமை நிலையில் இருந்து மீட்கவும், குற்றங்களைக் குறைக்கவும் கல்வி முக்கியமானது. இந்த மாற்றத்தின் ஆரம்பம் கல்வியாகும்.

இதனாலேயே எமது கொள்கை பிரகடனத்தில் கல்வி மறுசீரமைப்பு தொடர்பில் குறிப்பிட்டுள்ளோம்.

முதலாவதாக கல்வியில் இருக்கும் பிரச்சினைகளை அடையாளம் காண வேண்டும். இல்லாத பிரச்சினைகளுக்குத் தீர்வு காண்பதில் பிரயோசனமில்லை.

இந்த நேரத்தில் கல்வித்துறை முகங்கொடுத்துள்ள நெருக்கடிக்குத் தீர்வு காண வேண்டும்.