இஸ்ரேல் - ஈரான் அமைதியின்மை எம்மில் ஏற்படுத்தும் தாக்கம்

மத்திய கிழக்கில் நீண்ட காலமாக காணப்பட்டு வந்த பதட்ட நிலை, கடந்த வாரத்தின் பிற்பகுதி முதல் மோதலாக உருவெடுத்துள்ளது. குறிப்பாக, இஸ்ரேல் மற்றும் ஈரான் ஆகிய நாடுகளுக்கிடையில் வெள்ளிக்கிழமை பரஸ்பர தாக்குதல்கள் நடைபெற்றிருந்தன.

- ச.சேகர்

அதன் தாக்கத்தை உடனடியாகவே சர்வதேச சந்தையில் அவதானிக்க முடிந்தது. குறிப்பாக இந்த யுத்தம் நடைபெறும் பகுதி, கப்பல் போக்குவரத்தில் முக்கியத்துவம் வாய்ந்த பிரதேசமாக அமைந்திருப்பதால், எரிபொருள் விநியோகத்தில் தடங்கல்கள் ஏற்படலாம் என்ற பீதி முதலீட்டாளர்கள் மத்தியில் ஏற்பட்டுள்ளது. அத்துடன், இந்தப் பகுதியில் எழுந்துள்ள அமைதியின்மையின் காரணமாக, சரக்கு கப்பல் காப்புறுதி கட்டுப்பணங்களும் பெருமளவு அதிகரித்துள்ளன. குறிப்பாக, பிரென்ட் குரூட் எனப்படும் கச்சா எண்ணெய் விலை பெரல் ஒன்றுக்கு 8 சதவீத அதிகரிப்பைப் பதிவு செய்து, 75 அமெரிக்க டொலர்களாக பதிவாகியிருந்தது.

இந்த விலை உயர்வுகள் அனைத்தும், நுகர்வுச் சங்கிலியில் இறுதியாக அமைந்திருக்கும் இறுதி நிலை நுகர்வோரைச் சென்றடையும் என்பதில் விவாதங்களில்லை. ஒரு சில அபிவிருத்தியடைந்த நாடுகள் இந்த விலை உயர்வைத் தாம் பொறுப்பேற்று மக்களுக்கு ஏதேனும் வகையில் நிவாரணங்களை வழங்கிய போதிலும், இலங்கையைப் பொறுத்தமட்டில், அவ்வாறு நிவாரணம் வழங்கக்கூடிய நிலையில் தற்போது அரசாங்கத்தின் நிலை இல்லை என்பதே யதார்த்தம். கடந்த காலங்களில் எவ்விதமான தூர நோக்குமின்றி, இவ்வாறு தான்தோன்றித்தனமான நிவாரணங்களை வழங்கியிருந்த அரசாங்கத்தை மக்களே துரத்தியடித்திருந்தமை குறிப்பிடத்தக்கது.

எரிபொருள் என்பது போக்குவரத்து தேவைகளுக்கு மாத்திரமன்றி, பல்வேறு பொருட்களை உற்பத்தி செய்யும் செயன்முறையிலும் சேவை வழங்கல்களிலும் மூலப்பொருளாகப் பயன்படுத்தப்படுகின்றது. அதனால், எரிபொருள் விலை அதிகரிப்பு என்பது சகல பொருட்கள் மற்றும் சேவைகள் அதிகரிப்பிலும் தாக்கம் செலுத்தும். உதாரணமாக, மத்திய கிழக்கில் ஏற்பட்டுள்ள இந்த முறுகல் நிலையினால், நமது உள்நாட்டில் விளையும் மரக்கறிகளின் விலைகள், அல்லது எமது கடல் எல்லையினுள் பிடிக்கப்படும் மீன்களின் விலைகளில் கூட விலை அதிகரிப்பு ஏற்படுவதில் தாக்கம் செலுத்தும்.