பெண்களே “விழிப்புணர்வை ஏற்படுத்த வேண்டும்”

மதுபானம், புகைப் பொருட்கள் மற்றும் போதைப் பொருட்களின் பாவனைகளால் எமது நாடு பல்வேறு வழிகளிலும் பாதிப்படைகின்றது.

- 

குறிப்பாக பொருளாதாரம், சுகாதாரம், சமூக சீர்கேடுகள் என பல பிரச்சினைகள் இவற்றினால் ஏற்படுகின்றமை குறிப்பிடத்தக்கது. எமது நாட்டில் பெண்களின் மதுபான பாவனை மற்றும் புகைத்தல் பாவனை ஆகியன புறக்கணிக்கத்தக்க சதவீதத்திலேயே காணப்படுகின்றன.

ஆகவே, பெண்களை பாவனையாளர்களாக மாற்றுவதற்கும் பெண்கள் மத்தியில் மதுபானத்தையும், புகைப் பொருட்களையும் சாதாரணமாக்க வேண்டும் என்பதற்காகவும் மதுபான நிறுவனங்களும் புகையிலை நிறுவனமும் பல நுணுக்கங்களில் முயற்சித்து வருகின்றன, மேலும், பெண்களின் மதுபான பாவனை மிகவும் குறைவான விகிதாசாரத்தில் காணப்பட்டாலும் மதுபானத்தினால் ஏற்படுகின்ற பல்வேறு பிரச்சினைகளுக்குப் பெண்கள் முகங்கொடுக்கின்றனர்.

இவற்றை வெளிக்கொணரும் வகையிலும், ஏனையோரின் மதுபான பாவனையினால் பெண்கள் முகங்கொடுக்கின்ற பிரச்சினைகள் தொடர்பாக ஆராய்வதற்கும் 2025ஆம் ஆண்டு சர்வதேச மகளிர் தினத்தையொட்டி மதுபானம் மற்றும் போதைப்பொருள் தகவல் நிலையமானது ஆய்வொன்றினை மேற்கொண்டது.

25 மாவட்டங்களிலிருந்தும் 15 வயதிற்கும் மேற்பட்ட 1,000 பெண்களிடம் இவ் ஆய்வு மேற்கொள்ளப்பட்டது. இது மதுபான பாவனையினால் பெண்கள் எவ்வாறான பிரச்சினைகளுக்கு ஆளாகின்றனர், மதுபானம் எவ்வாறு பெண்களின் உரிமைகளை மீறுகின்றன? என்பனவற்றை ஆராயும் வகையில் மேற்கொள்ளப்பட்ட ஆய்வாகும்.

ஆய்வின் சாரம்சம்

• 54 சதவீதமான பெண்கள் மதுபான பாவனையினால் பிரச்சினைகளை எதிர்நோக்குகின்றனர்

• 42 சதவீதமான பெண்கள் உள ரீதியாகப் பாதிப்படைகின்றனர்

• 69 சதவீதமான பெண்கள் பொது இடங்களில் அசௌகரியங்களை எதிர்நோக்குகின்றனர்

• பெண்களின் உரிமைகளுடன் இணைத்து மதுபான நிறுவனங்கள் அதிகமான விளம்பரங்களை மேற்கொள்கின்றன. எனினும், 37 சதவீதமான பெண்கள் இன்னமும் அது தொடர்பாக அறிந்திருக்கவில்லை.

• மதுபான நிறுவனங்கள் தமது உற்பத்தி பொருளை விற்பனை செய்வதற்கு பெண்களை பயன்படுத்தும் சந்தர்ப்பங்களில் பெண்களின் உரிமைகள் மீறப்படுகின்றன என 64 சதவீதமான பெண்கள் குறிப்பிட்டனர்.