Geloof dra hom deur stryd

Etienne Laubscher is 'n bekende figuur aan die Weskus - veral vir sy betrokkenheid by kanovaart en die Weskus-kanowedvaartgemeenskap.

- Letitia Van Zyl-Schultz

Maar nege maande gelede het sy lewe skielik 'n dramatiese wending geneem toe hy vir 'n noodoperasie opgeneem is.

"Ná die noodoperasie het die medici geen idee gehad of ek twee weke, twee maande of twee jaar oor het nie," vertel hy.

Kort daarna het die diagnose gevolg: kolonkanker. 'n Tweede groot operasie was nodig, terwyl dokters ook bekommerd was oor kolle wat op sy lewer opgemerk is.

Die maande wat gevolg het, was gevul met onsekerheid, behandeling en eindelose wagtye. Chemoterapie met twee potensieel toksiese middels, gereelde besoeke aan drie hospitale en verskeie klinieke, asook lang ure op die pad, het deel van sy daaglikse werklikheid geword.