Reën demp nie Palm Tyres se glans

Nie eens swaar reën of die afwesigheid van twee van Atletiek SWD se uitblinkers kon Saterdag die geesdrif by die 29ste Palm Tyre-padwedlope kelder nie.

- Hugo Redelinghuys

(Langeberg) op pad na sy oorwinning in die mans groot-meesterafdeling by Saterdag se Palm Tyres-padwedlope in George. Foto: Hugo Redellinghuys

(Hugo Redellinghuys)

Waar die George-opgaardam se vlak al benoud laag is, het hardlopers die vroegoggendbuie verwelkom - en met dieselfde ywer die nat strate aangedurf.

Hoewel Lloyd Bosman (Nedbank) elders in aksie was - hy het in Gqeberha deelgeneem - en sy klubmaat Melissa van Rensburg steeds van 'n besering herstel, het sowat 400 entoesiastiese atlete opgedaag om hul uithouvermoë in uitdagende omstandighede te toets.

Palm Tyre se wiele het glad gerol en wéér bewys waarom dié padwedloop een van die streek se gewildstes bly.

Halfmarathon: Maboza maak dit syne

Bruce Maboza (Nedbank) het van die eerste kilometer af die pas aangegee en nooit teruggekyk nie. Hy het die 21,1 km-roete in 'n indrukwekkende 1:13:30 voltooi om eerste oor die eindstreep te draf.

Sy klubmaat Luciano Squire het sterk gevolg en tweede geëindig in 1:17:06, met Outeniqua Harriers se Jerome Ferland kort op sy hakke in 1:17:22 vir die derde plek.